Ազգային անվտանգության ծառայության կողմից նոյեմբերի 25-ին վնասազերծված, ծանր հանցագործություններ նախապատրաստվելու մեջ կասկածվողներից 21-ամյա Նելլի Մինասյանը կալանավորված է: Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանը դռնփակ դատական նիստում այսօր՝ նոյեմբերի 27-ին, նման որոշում է կայացրել:
NEWS.am-ի թղթակիցը հաղորդում է, որ դռնփակ նիստը, որը քիչ առաջ է ավարտվել, անցել է անսովոր մթնոլորտում: Նիստերի դահլիճից դուրս լսելի են եղել Նելլի Մինասյանի պաշտպանի բղավոցները:
Քիչ անց նիստերի դահլիճին է մոտեցել պաշտպանի՝ Ինեսսա Պետրոսյանի ամուսինը, որն ուտելիք է տարել Նելլի Մինասյանի համար: Մեր տեղեկություններով՝ պաշտպանը նկատել է, որ Նելլին թույլ է, պահանջել է, որ նրա համար սնունդ տարվի դատարան: Նիստի ավարտից հետո աղջիկը սնվել է:
Նշենք, որ դատարանում դեռ ընթանում են 21-ի ձերակալվածների խափանման միջոցն ընտրելու վերաբերյալ դռնփակ դատական նիստերը: Նրանցից 8-ն արդեն կալանավորված են՝ այդ թվում ազատամարտիկ Խաչիկ Ավետիսյանը, Մարինե եւ Ասյա Մկտչյանն քույրերը, ըստ ԱԱԾ-ի՝ խմբի պարագլուխ համարվող Արթուր Վարդանյանը, խմբի անդամներից Սրբուհին ու Դավիթը:
Հիշեցնենք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն: