Բելառուսը պատրաստ է նպաստել Եվրասիական տնտեսական միությունում Ադրբեջանի շահերն առաջ մղելուն : Այս մասին հայտնել է Բելառուսի նախագահ Ալեքսանդր Լուկաշենկոն:
«Ադրբեջանը եղել է ու մնում է Բելառուսի հուսալի ընկերն ու գործընկերը: Մեք բարձր ենք գնահատում մեր բարեկամությունը ու պատրաստ ենք նաեւ անկեղծորեն ու բացահայտ աջակցել ԵՏՄ-ում ձեր շահերն առաջ մղելուն»,- ասել է Լուկաշենկոն պաշտոնական այցով Բելառուսում գտնվող իր ադրբեջանցի գործընկեր Իլհամ Ալիեւի հետ հանդիպման ժամանակ:
Նա շեշտել է, որ հաշվի առնելով համաշխարհային տնտեսությունում ճգնաժամային երեւույթները, երկրները պետք է իրենց ուշադրությունը կենտրոնացնեն փոխշահավետ համագործակցության նոր ծրագրերի ու ուղղությունների վրա: «Ներկա բարդ իրավիճակում մեր պետությունները թույլ չեն տվել, որ փոխադարձ ապրանքաշրջանառությունը զգալիորեն նվազի: Այդուհանդերձ ժամանակը մեզանից պահանջում է արագ ու արդյունավետ լուծումներ տնտեսական փոխգործակցությունը զարգացնելու համար՝ այդ թվում երրորդ երկրների շուկաներում», - ասել է նախագահը, հայտնում է «ՌԻԱ Նովոստին»:
Նա առաջարկել է համատեղ նախագծեր մշակել տեղեկատվական տեխնոլոգիաների ու տեղեկությունների պաշտպանության ոլորտում, նաեւ՝ Բելառուսի օգնությունը Ադրբեջանի տրանսպորտային ենթակառուցվածքի կատարելագործման հարցում: Օրինակ Բաքվի կենտրոնի ու արվարձանների միջեւ քաղաքային գծային արագընթաց տրանսպորտի երթեւեկության գծերի նախագծման ու սարքավորումների մատակարարման, նաեւ Հեյդար Ալիեւի անվան օդանավակայանի հետ հաղորդակցության լրացուցիչ հարմարավետ պայմաններ ապահովելու հարցում: Լուկաշենկոն հայտարարել է, որ պատրաստ է Ադրբեջան մատակարարել բելառուսական ավտոբուսներ ու երկաթգծային ուղեւորատար գնացքներ, որոնք թողարկում է Մինսկը՝ շվեյցարական «Շտադլեր» ընկերության հետ համատեղ:
Բելառուսի առաջնորդը նշել է, որ ծխախոտի ու դրա հումքի փոխմատակարարումների զարգացումը նույնպես ներուժ ունի: «Ցանկալի կլիներ նաեւ դիտարկել համագործակցության հնարավորությունները էներգետիկայի, նավթաքիմիայի, գյուղատնտեսության ոլորտներում»,- ասել է նա:
Լուկաշենկո հավելել է, որ նեղ կազմով հանդիպման ժամանակ Ալիեւի հետ պայմանավորվել է «համագործակցության որոշակի ուղղությունների մասին՝ ագրոարդյունաբերական համալիրից սկսած մինչեւ նավթի վերամշակում»: