Սիրիայում թուրքական կողմի խոցած ռուսական Սու-24-ի օդաչու Օլեգ Պեշկովի մարմինը, ռուսական կողմի դիմումի համաձայն, կփոխանցվի Մոսկվային: Reuters-ի փոխանցմամբ, այս մասին Անկարայում կայացած ասուլիսում հայտարարել է Թուրքիայի վարչապետ Ահմեդ Դավութօղլուն:
Նրա խոսքով, այս գիշեր Հաթայի ուղղափառ հոգեւորականների մասնակցությամբ անհրաժեշտ կրոնական արարողություն է կատարվել:
Թուրքիայում Ռուսաստանի դեսպանության մամուլի կցորդ Իգոր Միտյակովի խոսքով, ռուսաստանցի օդաչուի մարմինը ռուսական դիվանագետներին կփոխանցեն նոյեմբերի 29-ին: «Մեզ հաստատեցին, որ ՌԴ հերոս Օլեգ Անատոլիի Պեշկովի մարմինն այսօր Հաթայից Անկարա կփոխադրվի: Անկարայի օդանավակայանում ինքնաթիռը կդիմավորեն ՌԴ դեսպան Անդրեյ Կառլովը եւ դեսպանության ներկայացուցիչներ: Ռուսաստան օդաչուի մարմնի տեղափոխման օրը դեռեւս հստակեցվում է»,- Միտյակովի խոսքերն է փոխանցում ՏԱՍՍ-ը: