ՌԴ Կամչատկայի երկրամասում ոստիկանները ձերբակալել են դասալիք զինվորին, որը զորամասը լքել էր 2004թ. եւ մինչեւ այսօր ապրում էր անտառում։ Տղամարդուն գտել են Ռադիգինո ավանի բնակիչների հաղորդած տեղեկության շնորհիվ, հայտնում է ՏԱՍՍ-ը՝ վկայակոչելով ՆԳՆ Կամչատկայի երկրամասի մամուլի ծառայության ներկայացուցիչ Ալլա Իվանովային։
«Այն բանից հետո, երբ 30-ամյա տղամարդուն տարել են ոստիկանական բաժանմունք, պարզվել է, որ նա Կրասնոդարի երկրամասի Տագանռոգ քաղաքի բնակիչ է։ 2003թ. նրան բանակ էին զորակոչել Կամչատկա։ Մեկ տարի անց նա ինքնակամ լքել էր զորամասը»,- նշել է նա։
Տղամարդու նկատմամբ հետախուզում էր հայտարարվել, իսկ հետո նրա հարազատները հայտնել էին, որ ճանաչել են նրա մարմինը Տագանռոգում հայտնաբերված դիակների մեջ։ Տղամարդուն հուղարկավորել էին, հետագա հետախուզումը դադարեցվել էր։
«Դասալիքը ոստիկաններին պատմել էր, որ Պետրոպավլովսկ-Կամչատկայի անտառում հին շինանյութերից տուն էր կառուցել եւ տարբեր միջոցներով գումար հայթայթելով՝ պահել գոյությունը»,- ասել է գործակալության զրուցակիցը։
Ոստիկանների հավաքած նյութերը հանձնել են ռազմական քննչական վարչություն։
