«Նոր Հայաստան» փրկության ճակատը դեկտեմբերի 1-ին Ազատության հրապարակում հնարավոր է տեղադրի վրաններ։ Այսօր՝ նոյեմբերի 30-ին, լրագրողների հետ հանդիպման ժամանակ այս մասին հայտարարեց «Նոր Հայաստան» միասնական շտաբի ղեկավար Ժիրայր Սեֆիլյանը՝ հավելելով, որ քաղաքապետարանն արդեն իրազեկվել է այդ մասին, սակայն թույլտվության մասին որոշում դեռ չկա։
«Այսօր առավոտյան մեր ներկայացուցիչներն իրազեկել են քաղաքապետարանին վրանների թույլտվություն ստանալու նպատակով, որովհետեւ ընդվզման տարբերակներից մեկը պիտի լինի վրանային պրոցեսը։ Սակայն վերջնական որոշումը վաղը կլինի։ Քաղաքացիական անհնազանդության տարաբնույթ տեսակներ գոյություն ունեն։ Մենք այդ օրը պիտի տարբերակներ առաջարկենք, ինչու չէ նաեւ պիտի լսենք տարբերակներ քաղաքացիներից։ Սակայն շատ շուտ պետք է ամփոփենք ու որոշենք՝ ինչ ենք անելու, քանի որ տարաբնույթ են նաեւ քաղաքացիական անհնազանդության ճնշման մեթոդները, ուստի որոշումը պիտի տեղում լինի»,-նշեց Սեֆիլյանը։
Վերջինս շեշտեց, որ մի որոշումն է արդեն հստակ ՝ այդ օրը տուն չեն վերադառնալու։
«Այն ժողովուրդն է լինելու հրապարակում, որը եթե հավատացել է մեր կոչին ու եկել, ուրեմն գալիս է ոչ հետ վերադառնալու տամադրությամբ»,-ասաց Սեֆիլյանը։
Հայտարարեց, որ իրենց կհաջողվի մինչեւ դեկտեմբերի 6-ը կասեցնել հանրաքվեի ընթացքը, ապա անցնել հաջորդ քայլին՝ ռեժիմին կապիտուլացիայի ենթարկելու օրակարգի ձեւավորմանը։
