Ռուսաստանի համար վտանգավոր է Թուրքիայում ատոմակայան կառուցելը՝ հաշվի առնելով այդ երկրի միջուկային հավակնությունները։ Այս մասին նոյեմբերի 30-ին լրագրողներին ասել է Հայոց ցեղասպանության թանգարան-ինստիտուտի փոխտնօրեն, արեւելագետ Սուրեն Մանուկյանը։
Նրա խոսքով՝ Ռուսաստանի ուժերով «Թուրքական հոսք» գազամուղի նախագիծը եւ Ակկույու ԱԷԿ-ի կառուցումը կարելի է ավարտված համարել։ «Այստեղ ԱԷԿ-ն ավելի կարեւոր է, քան գազատարը։ Արդեն հիմա թուրքական փորձագիտական շրջանակներում կարծիք է հնչում, որ Թուրքիան Ռուսաստանին ոչնչով չի զիջում միջուկային զենքից բացի։ Թուրքիան ոչնչով պակաս չէ Իրանից եւ Պակիստանից։ Նման երկրին միջուկային տեխնոլոգիաներ տալը շատ զարմանալի եւ անհեռատես քայլ կլիներ։ Սակայն ռուսական քաղաքականությունն այնքան լի է նման ապշեցուցիչ բաներով, որ դժվար է զարմանալ»,- ասել է փորձագետը։