Իսպանիան 2015-2020 թթ-ին 120 մլն եվրո կհատկացնի Կանաչ կլիմայի հիմնադրամին: Այդ մասին Փարիզում ասել է երկրի վարչապետ Մարիանո Ռախոյը:
«Վերջին չորս տարվա ընթացքում մենք 1,4 միլիարդ եվրո ենք ներդրել զարգացող երկրներում կլիմայական փոփոխությունների դեմ պայքարի գործում: Եվ այժմ պարտավորություն ենք ստանձնում 2015-2020-ին 120 մլն եվրո հատկացնել Կանաչ կլիմայի հինադրամին: Մինչեւ 2030-ը մենք եվրոպացի գործընկերների հետ պարտավորություն ենք ստանձնել առնվազն 40 տոկոսով կրճատել արտանետումները 1990-ի համեմատ», — ասել է Ռախոյը, տեղեկացնում է «ՌԻԱ Նովոստին»:
Նա նաեւ տեղեկացրել է, որ Իսպանիան կատարել է Կիոտոյի արձանագրության առումով բոլոր պարտավորությունները` հիշեցնելով, որ այն «ընդամենը 36 երկիր է ստորագրել, իսկ ոմանք հետագայում նույնիսկ հրաժարվել են դրանից» եւ հույս է հայտնել, որ Փարիզի համաժողովի արդյունքն անհամեմատ ավելի նշանակալի կլինի, որովհետեւ դրան 180 երկիր է մասնակցում:
«Այստեղ` Փարիզում կլիմայական փոփոխություններին համընդհանուր եւ հավակնոտ պատասխան է անհրաժեշտ: Փարիզը պիտի առաջարկի կրճատել արտանետումները, ինչը թույլ կտա հասնել նրան, որ ջերմաստիճանի երկու աստիճանից ավելի բարձրացում տեղի չունենա: Պետք է համընդհանուր, հավակնոտ համաձայնագիր ստորագրել, որի կատարումը պարտադիր լինի», — կոչ է արել Ռախոյը:
Բացի այդ, Իսպանիան կշարունակի միջոցներ ներդնել զարգացող երկրներում կլիմայական փոփոխությունների դեմ պայքարը ֆինանսավորելու համար. այդ նպատակի համար վերջին չորս տարիներին պետբյուջեից 1,4 մլրդ եվրո է հատկացվել, ասել է վարչապետը:
