Բաղրամյան պողոտայից այսօր՝ նոյեմբերի 30-ին «Կարմիր քարտ» նախաձեռնության բերման ենթարկված 5 անդամներին քիչ առաջ բաց են թողել ոստիկանության Կենտրոնի բաժնից, որտեղ ակտիվիստների նկատմամբ վարչական վարույթ է հարուցվել: Այս մասին NEWS.am-ին հայտնեց նախաձեռնության անդամ Փայլակ Թեւանյանը՝ հավելելով, որ իրենք բաժնում 3 ժամ են մնացել:
Նախաձեռնության անդամը նշեց, որ ոստիկաններն իրենց բերման են ենթարկել առանց հիմնավոր պատճառաբանության:
«Կոնկրետ իմ մասով ասում են, որ ինձ բերման են ենթարկել փողոցը փակելու համար, բայց ես այդ ժամանակ հեռախոսով էի խոսում եւ ուշ մոտեցա հավաքվածներին: Մայթին կանգնած ոստիկանը հրեց ինձ, ես էլ իրեն հրեցի ու ինձ տարան բաժին: Առանց հիմնավորելու բերման ենթարկելն առեւանգում է, ես իրենց էլ դա ասացի»,-ասաց Փայլակ Թեւանյանը:
Երիտասարդը նշեց, որ բաժնում իր նկատմամբ ֆիզիկական բռնություն չեն գործադրել, սակայն թույլ չեն տվել հարազատներին իր գտնվելու վայրի մասին հաղորդել, ինչպես նաեւ զանգահարել փաստաբանի:
Փայլակ Թեւանյանը նշեց, որ ոստիկանները իրեն իր իրավունքների մասին երկար ժամանակ չեն տեղեկացրել, քանի որ ինքը հրաժարվել է ներկայանալուց:
«Կարմիր քարտ» նախաձեռնության անդամնը նշեց, որ ինքը եւ 50 000 ՀՀ դրամի չափով վարչական տույժի ենթարկված իր մյուս 4 ընկերները չեն վճարելու այդ գումարը՝ պատճառաբանելով «մինչեւ բանը հասնի դրան, մենք վստահ ենք, որ երկրում պետական հեղաշրջում եղած կլինի»:
NEWS.am-ին ոստիկանությունից հայտնեցին, որ ակտիվիստները բերման են ենթարկվել Վարչական իրավախախտումների վերաբերյալ ՀՀ օրենսգրքի 182-րդ հոդվածի համաձայն՝ ոստիկանի օրինական պահանջը չկատարելու պատճառով:
Նշենք, որ նախաձեռնության մի քանի տասնյակ անդամներ այսօր՝ նոյեմբերի 30-ին, Երեւանի Ազատության հրապարակից երթով շարժվեցին Բաղրամյան պողոտա՝ նպատակ ունենալով բողոքի ակցիա անցկացնել նախագահական նստավայրի առջեւ: Ոստիկանները սակայն ակտիվիստներին այդպես էլ թույլ չտվեցին մոտենալ նախագահականին, ինչից մի քանի անգամ բախումներ տեղի ունեցան: Բախումների արդյունքում բերման էր ենթարկվել 5 ակտիվիստ: Ըստ նախնական տվյալների, սակայն, բերման ենթարկվածների թիվը 6-ն էր:
