Ադրբեջանի մայրաքաղաք Բաքվից ոչ հեռու գտնվող Նարդարան ավանում Ադրբեջանի ՆԳՆ-ն, ԱԱՆ-ն եւ Գլխավոր դատախազությունը հատուկ գործողություն են իրականացնում։ Այս մասին հայտնում է ԱՊԱ-ն՝ վկայակոչելով ՆԳՆ մամուլի ծառայությունը։ Նոյեմբերի 26-ին Նարդարանում հատուկ գործողության ընթացքում վնասազերծվել էր զինված հանցավոր խմբավորում, որը պլանավորում էր բռնի ուժով տապալել գործող սահմանադրական կարգը եւ շարիաթի օրենքներ հաստատել։

Դեպքի վայրից որպես իրեղեն ապացույց առգրավվել է 4 ինքնաձիգ, 4 ատրճանակ, 12 ձեռքի նռնակ, 3 պայթուցիկ սարք, 10 միավոր «Մոլոտովի կոկտեյլ», 7 դանակ եւ դաշույն, 3 կաստետ եւ այլն։ Խմբավորման 24 անդամների նկատմամբ որպես խափանման միջոց է ընտրվել կալանքը։

Հատուկ գործողությունների ավարտից հետո Նարդարանում չարտոնագրված հավաքներ են տեղի ունեցել, որոնց ժամանակ ժողովրդին զանգվածային անհնազանդության կոչեր են արել։ Նրանք փակել են ճանապարհները, բարիկադներ կառուցել եւ զենք հավաքել։ Անցկացված միջոցառումների ընթացքում այս գործողությունները ճնշվել են։

Նոյեմբերի 30-ին Գյանջայում 6 մարդ էր ձերբակալվել։ Նրանցից առգրավվել է 1 ինքնաձիգ, 1 հրացան, 12 նռնակ եւ այլ զինամթերք ու կրոնական գրականություն։

Դեկտեմբերի 1-ին տեղական ժամանակով ժամը 08։00-ին ավանում նոր հատուկ գործողություն է սկսվել։