Չիլիի իշխանություններն ու գիտնականներն ուսումնասիրում են ավելի քան 300 կետերի մահվան հանգամանքները, որոնց դիերը հայտնաբերվել են Պենյաս խաղաղօվկիանոսյան նեղուցի ափին: Ինչպես նախօրեին հայտնել է Լատինաամերիկյան երկրի ազգային հեռուստատեսությունը, արդեն հաստատ պարզվել է, որ կաթնասունների մահվան պատճառը մարդիկ չեն:
Ըստ հիմնական վարկածի, կենդանիների զանգվածային մահվան պատճառ կարող էին դառնալ թույները, որոնք արտազատվում են ծովային միկրոսկոպիկ ջրիմուռներից: Դրանց արագ բազմացումը ստացել է «կարմիր ներհոսք» անվանումը: Այս երեւույթի ժամանակ ջրում թույների խտությունը մահացու վտանգավոր է դառնում ծովի բնակիչների համար, հայտնում է ՏԱՍՍ-ը:
Առաջին անգամ Չիլիի ափերի մոտ 30 մահացած կետ էին գտել մայիսին: Արդեն այն ժամանակ բնապահպաները ու Ձկնորսության ազգային ծառայությունը սկսել էին տագնապ հայտարարել: Հունիսին այդ դժվարհասանելի տարածք է գնացել հետազոտողների նոր խումբ: Օդանավից նրանք տեսել են, որ աղետի ծավալները շատ ավելի մեծ է, քան սկզբում էր համարվում: Ընդհանուր առմամբ հետազոտողները 337 ծովային կենդանու մնացորդ են գտել: Գիտնականները նշում են, որ սա կետերի մահվան ամենազանգվածային դեպքն է:
Նոյեմբերի կեսերին Ձկնորսության ազգային ծառայությունը դիմել էր իշխանություններին՝ խնդրելով հետաքննել կատարվածի հանգամանքները: Ակնկալվում է, որ հունվարին նեղուց կուղեւորվի նոր գիտարշավ, որը պետք է պարզի, թե որ տեսակին են պատկանում զոհված կետերը, ու արդյոք դրանց ոչնչացման վտանգ չի սպառնում: