Երեւանի Խաչատուր Աբովյանի անվան հայկական պետական մանկավարժական համալսարանին հարող տարածքում նոյեմբերի 19-ին Հայաստանում ֆրանսիական համալսարանի Փիլիսոփայության ամբիոնի վարիչի մասնակցությամբ տեղի ունեցած վիճաբանությունը եղել է հարբած երիտասարդների պատճառով՝ ավտոմեքենան սխալ մկայանելու հարցի վերաբերյալ: Այս մասին այսօր` դեկտեմբերի 1-ին, NEWS.am-ին ասացին ՀՊՄՀ Լրատվության եւ հանրության հետ կապերի վարչությունից` նշելով, որ այդ վիճաբանությունը քաղաքական կոնտեքստ չունի եւ կապ չունի սահմանադրական փոփոխությունների հետ:
Համալսարանից մեզ տեղեկացրին, որ Հովհաննես Հովհաննիսյանը ՀՊՄՀ-ի մշտական աշխատակից չէ եւ այդ օրն էլ համալսարանում դասաժամ չի ունեցել եւ այլ հարցերով է գնացել համալսարան եւ երբ փորձել է մեքենան կայանել, սխալ կայանված մեքենայի հարբած վարորդի պատճառով վիճաբանություն է սկսվել:
Նշենք, որ ՀՊՄՀ Լրատվության եւ հանրության հետ կապերի վարչությունը միջադեպի հետ կապված պարզաբանում է տարածել, ըստ որի` Մանկավարժական համալսարանի հետ ոչ մի առչություն չունեցող, համալսարանին հարող տարածքում տեղի ունեցած վիճաբանության փաստի առթիվ հարուցվել է քրեական գործ, որը քննվում է Երեւան քաղաքի ոստիկանության Կենտրոնի քննչական բաժնում:
Ավելի վաղ NEWS.am-ը հայտնել էր, որ «Հայկական ժամանակ» թերթը գրել է. «Մեզ հասած տեղեկություններով՝ օրերս Երեւանի Խաչատուր Աբովյանի անվան հայկական պետական մանկավարժական համալսարանում ծեծի է ենթարկվել «ոչ»-ի կողմնակից, փիլիսոփայական գիտությունների թեկնածու Հովհաննես Հովհաննիսյանը։
Ըստ լուրերի նրան ծեծել են ՀՀԿ-ական «այո»-ականները հենց սահմանադրական փոփոխությունների հողի վրա։ Մեր թղթակցի հետ զրույցում Հովհաննիսյանն ասել է. «Քաղաքական ենթատեքստով որեւէ բան չի եղել, բախում եղել է խուլիգանական խմբավորման հետ, բայց դա քաղաքական ենթատեքստ չունի, այս պահին այսքանը, ուրիշ բան չեմ կարող ասել։ Այսքանով բավարարվեք»։
Ամեն ինչ, ըստ լուրերի, սկսվել է սահմանադրական փոփոխությունների քննարկումից։ Քննարկումն այնքան է թեժացել, որ վերածվել է ծեծկռտուքի ուսանողների մասնակցությամբ»:
