Հայաստանում հատկապես ծանր հանցագործությունների համար դատապարտվածների ու ցմահ բանտարկյալների  ժամադրությունների քանակը կավելացնեն։ ՀՀ Քրեական դատավարության օրենսգրքում համապատասխան փոփոխությունների նախագիծը հավանություն է ստացել դեկտեմբերի 10-ին կայացած Կառավարության նիստում։

Ըստ գործող օրենսդրության՝ բանտարկյալների նշված խմբին թույլ են տալիս տարեկան առնվազն 3 կարճաժամկետ (մինչեւ 4 ժամ) եւ առնվազն 1 երկարաժամետ (մինչեւ 3 oր) ժամադրություն։ Նախատեսված է բանտարկության առաջին 10 տարիներից հետո այդ եւ մյուս ժամադրությունների թիվը կրկնակի ավելացնել։

Փոփոխությունը կիրառվում է այդ թվում Հայաստանի միջազգային պարտավորություններին համապատասխան, այն է՝ Եվրոպայի խորհրդի նախարարների հանձնաժողովի «Եվրոպական բանտային կանոնների մասին» հրամանի  համաձայն, որը նախատեսում է բանտարկյալների համար արտաքին աշխարհի եւ հատկապես հարազատների հետ հնարավորինս շատ կապ ապահովել։

Արդարադատության նախարար Արփինե Հովհաննիսյանի խոսքով՝ օրինագիծը նախատեսում է փոփոխություններ կատարել Քրեակատարողական օրենսգրքի 92-րդ հոդվածի 2-րդ մասում։ Հոդվածը կլրացվի հետեւյալ արտահայտությամբ. «Հատկապես ծանր հանցագործությունների համար որոշակի ժամկետով ազատազրկման դատապարտված կամ ցմահ ազատազրկված անձանց համար 10 տարի անց մեկ տարվա ընթացքում առնվազն 6 կարճաժամկետ եւ 2 երկարաժամկետ ժամադրություն է նախատեսվում»։