Հետադարձ ուժով հոկտեմբերի 1-ից ուժի մեջ մտած` ՀՀ կառավարության 2015թ. հոկտեմբերի 29–ի որոշման համաձայն` ամսական 250 կՎտ/ժ–ից ավելի ծախսած էլեկտրաէներգիայի դիմաց սպառողները սուբսիդավորում չեն ստանում։ Այս մասին NEWS.am-ի հետ զրույցում ՀՀ Էներգետիկայի եւ բնական պաշարների նախարարության մամուլի քարտուղար Վասակ Թարփոշյանը` արձագանքելով սպառողների դժգոհություններին, թե էլեկտրաէներգիայի սուբսիդավորումը դադարեցվել է։

«Սկսած այս թվականի օգոստոսի 1-ից սուբսիդավորում իրականացվում է, այլ հարց է, որ հոկտեմբերի 1-ից սուբսիդավորման կարգը փոխվել է։ Եթե օգոստոս-սեպտեմբեր ամիսներին բնակիչ բաժանորդներն օգտագործված ամբողջ էլեկտրաէներգիայի համար ստանում էին փոխհատուցում, ապա հոկտեմբերի 1-ից սկսած` փոխհատուցում տրամադրվում է մինչեւ 250 կՎտ/ժ օգտագործած բնակիչ բաժանորդներին, դրանից ավելի սպառած էլեկտրաէներգիան բաժանորդների համար չի սուբսիդավորվում»,-տեղեկացրեց Վասակ Թարփոշյանը։

ՀՀ Էներգետիկայի եւ բնական պաշարների նախարարության մամուլի քարտուղարի կարծիքով` բնակչության շրջանում դժգոհություններն առաջացել են այն պատճառով, որ  նոյեմբեր ամսին ավելի շատ էլեկտրաէներգիա են սպառել։

«Գուցե շատ են սկսել այս ամիսներին սպառել՝ 250-ից ավելի, իսկ այս դեպքում պետք է կրկնեմ, որ Կառավարության որոշմամբ արդեն սպառողներին սուբսիդավորում չի տրամադրվում, այդ պատճառով էլ դժգոհություններ են հայտնում սպառողները»,-նշեց   Վասակ Թարփոշյանը։

Նրա խոսքով՝ 500 կՎտ/ժ էլեկտրական էներգիայի սպառում ունեցող  այլ սպառողների՝ ՓՄՁ-ների սուբսիդավորման կարգում որեւէ փոփոխություններ չեն եղել։

«ՓՄՁ-ների դեպքում ինչպես եղել, այնպես էլ մնում է ՝մինչեւ 500 կՎտ/ժ-ի 250-ը սուբսիդավորվում է, 500 կՎտժ-ից ավելի էլեկտրաէներգիա սպառելու դեպքում չի սուբսիդավորվում»,-ասաց Վասակ Թարփոշյանը։

Հիշեցնենք, որ 2015թ. օգոստոսի 1–ից ՀԾԿՀ–ի որոշմամբ էլեկտրաէներգիան ՀՀ սպառողների համար թանկացել է 6,93 դրամով։ Մինչեւ 2016-ի հուլիսի 31-ը ՀԷՑ–ը ձեռք բերած «Տաշիր» ընկերությունների խումբը կառավարության հետ համատեղ կսուբսիդավորի էլեկտրաէներգիայի թանկացումը ՀՀ սպառողների համար։