Թուրքիայում անցկացված հանրաքվեն բացառիկ նշանակություն ունի երկրում ժողովրդավարության վերջնական ամրապնդման եւ կայացման հարցում։ NEWS.am-ի թղթակցի հետ զրույցում նման կարծիք հայտնեց Թուրքիայում լույս տեսնող «Ժամանակ» հայկական թերթի գլխավոր խմբագիր Արա Գոչունյանը։ Նրա խոսքով, համազգային քվեարկությունը պետք է դիտարկել որպես բացառապես դրական երեւույթ։
«Քվեարկությանը մասնակցել է ընտրելու իրավունք ունեցող քաղաքացիների 77 տոկոսը, եւ սա լավագույն արդյունքն է ողջ պատմության ընթացքում»,- նշեց Գոչունյանը՝ ավելացնելով, որ հանրաքվեն անցել է թափանցիկ եւ խաղաղ։
«Միայն մի քանի շրջաններում փոքրաթիվ խմբեր փորձել են իրենց գործողություններով հասնել հանրաքվեի բոյկոտի, սակայն այդ փորձերն իրավապահների կողմից կասեցվել են»,- ճշգրտեց «Ժամանակ» թերթի գլխավոր խմբագիր Արա Գոչունյանը։
Նրա կարծիքով, ընդհանուր առմամբ, հանրաքվեն գրեթե իդեալական է անցել։ «Նախնական արդյունքների հայտարարումից անմիջապես հետո, ելույթ ունեցավ վարչապետ Էրդողանը, հետո նրան զանգահարեց եւ շնորհավորեց ԱՄՆ նախագահ Բարաք Օբաման, ժողովուրդը գոհ է, ընդդիմությունն ընդունել է արդյունքները»,- ամփոփեց Գոչունյանը։
