Իրանը փաստացի ուզում է ԵԱՀԿ Մինսկի խմբից անջատ որպես միջնորդ հանդես գալ Ղարաբաղի հարցում։ Այս մասին փետրվարի 1-ին կայացած մամուլի ասուլիսի ժամանակ ասել է արտակարգ եւ լիազոր դեսպան Արման Նավասարդյանը։
Նրա կարծիքով դա հայկական կողմի համար այնքան էլ լավ չէ։ Նավասարդյանը հիշեցրել է, որ Իրանը հնչեցրել է Ղարաբաղի հարցում որպես միջնորդ հանդես գալու առաջարկը։ «Դա նորություն չէ։ Թեհրանը չի պարզաբանում, թե ինչ ձեւաչափով է ուզում իրականացնել միջնորդ առաքելությունը։ Իրավիճակը կարող է սրվել, քանի որ Թուրքիան, որը երազում է միջամտել եւ օգնել Ադրբեջանին, կարող է նույնպես նման ցանկություն հայտնել»,- նշել է Արման Նավասարդյանը։
Նա նշել է, որ նավթից եւ գազից բացի, Իրանը հավակնում է տարածաշրջանում դառնալ ոչ միայն համար մեկ երկիրը, այլ նաեւ գերտերություն։ «Օգտվելով ներկայիս վիճակից՝ Իրանը ցանկանում է տարածաշրջանում վճռորոշ ձայն ստանալ»,- հավելել է Արման Նավասարդյանը։
Ավելի վաղ Իրանի ԱԳՆ-ի պաշտոնական ներկայացուցիչ Հուսեյն Ջաբեր Անսարին հայտնել էր, որ Թեհրանը պատրաստ է Ադրբեջանի եւ Հայաստանի միջեւ միջնորդ հանդիսանալ ղարաբաղյան հակամարտության լուծման գործում:
«Եթե մենք նայենք անցյալին, կտեսնենք, որ Իրանը ծանր պահերին փորձել է կանխել հարեւան Հայաստանի եւ Ադրբեջանի միջեւ տարաձայնությունները։ Հիմա, եթե Հայաստանն ու Ադրբեջանը ցանկանան, Իրանը պատրաստ է խաղալ այդ դերը եւ որպես միջնորդ հանդես գալ այդ հակամարտության լուծման համար»,- ասել էր Անսարին։