Գյումրիի Անիի թաղամասում փետրվարի 1-ի կեսգիշերին Երանոսյանների բնակարան ներխուժելու փորձ կատարած ռուս զինծառայողը ռուսական 102-րդ ռազմաբազայի պայմանագրային զինծառայող, 1990 թ. ծնված Սերգեյ Վալերի Սուդնիկովն է, նրա մոտ զենք չի հայտնաբերվել: Այս մասին NEWS.am-ին հայտնեց Շիրակի մարզի դատախազ Րաֆֆի Ասլանյանը՝ նշելով, որ զինծառայողը բացատրություն է տվել ոստիկանությունում եւ վերադարձել ծառայության:
«Ըստ նրա բացատրության՝ նա շփոթել է շենքը, քանի որ հարեւանությամբ գտնվող շենքում՝ կրկին չորրորդ հարկում բնակվում է իր ծառայակից ընկերը»,- ասաց Րաֆֆի Ասլանյանը:
Դատախազը նշեց, որ տասնօրյա ժամկետում ձեռք բերված փաստական տվյալների հիման վրա կպարզվի տվյալ միջադեպը հանցագործության հատկանիշներ պարունակում է, թե ոչ: Քրեական գործ առայժմ չի հարուցվել:
Հիշեցնենք, որ զինծառայողը փորձել էր ներխուժել Գյումրու Անի թաղամասի Պարույր Սևակ 13 շենքի 116 բնակարան: Տանտիրուհին NEWS.am-ին պատմել էր, որ զինծառայողը եղել է հարբած, անդադար թակել է դուռը: