Քննարկման փուլում է Իրաք-Իրան-Հայաստան ճանապարհի հարցը: Այս մասին, այսօր՝ փետրվարի 3-ին, ՀՀ-ում Իրանի նորանշանակ դեսպան Սեյեդ Քազեմ Սաջադիի եւ ԻԻՀ դեսպանության խորհրդական Սոփանի Փարի հետ հանդիպման ժամանակ նշեկ է ՏԿԱԻ նախարար Արմեն Երիցյանը:
ՏԿԱԻՆ-ից NEWS.am-ին հայտնում են, որ շնորհավորելով պարոն Սաջադիին դեսպանի պաշտոնում նշանակվելու կապակցությամբ՝ նախարար Երիցյանը ներկայացրեց ՏԿԱԻՆ-ի ծառայություններն ու գործառույթները՝ նախանշելով այն բնագավառները, որոնցում նախարարությունը կարող է նպաստել հայ-իրանական համագործակցության խորացմանը: Նախարարը ներկայացրեց նաեւ իր այցը Իրաքի Հանրապետություն՝ նշելով, որ քննարկման փուլում է Իրաք-Իրան-Հայաստան ճանապարհի հարցը:
Շնորհակալություն հայտնելով նախարարին ջերմ ընդունելության համար՝ դեսպան Սեյեդ Քազեմ Սաջադին նշեց, որ նպատակ ունի խորացնել Հայաստանի եւ Իրանի համագործակցությունը բոլոր բնագավառներում:
ՏԿԱԻՆ-ի հետ համատեղ աշխատանքների մասով քննարկվեց համագործակցությունը սեյսմիկ պաշտպանության, փրկարարաորոնողական աշխատանքների կազմակերպման եւ իրականացման, բնական եւ տեխնածին աղետների կանխման բնագավառում:
Տարածքային կառավարման ոլորտում առանձին մարզերի եւ քաղաքների միջեւ համագործակցությունը խորացնելու նպատակով դեսպանը նախարար Երիցյանին խնդրեց ՏԿԱԻ նախարարության անունից հրավեր ուղարկել Իրանի Հանրապետության Իսպահանի, Հորմոզգանի, Գիլանի նահանգապետերին եւ Թեհրանի մարզպետին: Այցի նպատակն է խորացնել Իրանի եւ Հայաստանի մարզերի համագործակցությունը գյուղատնտեսության եւ հատկապես ձկնաբուծության ոլորտում:
Կարեւորելով երկու երկրների միջեւ մերձեցումը նաեւ մարզային մակարդակով՝ նախարար Երիցյանը հանձնարարեց պատրաստել համապատասխան հրավերները՝ հավաստիացնելով դեսպանին, որ ՏԿԱԻ նախարարությունն իր գործառույթների ոլորտում կանի ամեն ինչ հայ-իրանական համագործակցությունը խորացնելու եւ որակապես նոր մակարդակի վրա բարձրացնելու համար:
Հանդիպման ավարտին նախարար Երիցյանը հյուրերին ներկայացրեց ՀՀ ՏԿԱԻ Ճգնաժամային կառավարման ազգային կենտրոնի եւ ՀՀ կառավարության սերվերային տնտեսության պահուստի հնարավորությունները: