Հայաստանը շատ վաղուց չի զարգանում տնտեսական իրավիճակի պատճառով. մեզանում տեղի են ունենում խորքային լուրջ երեւույթներ, որոնց մասին խուսափում են ներկայացնել: Այս մասին այսօր՝ փետրվարի 4-ին, լրագրողների հետ հանդիպման ժամանակ նշել է Կենտրոնական բանկի նախկին նախագահ, տնտեսագետ Բագրատ Ասատրյանը:
Նա նշել է այն 4 գլոբալ խնդիրները, որոնց հետ բախվում է Հայաստանը՝ աղքատություն, արտագաղթ, մենաշնորհներ եւ կոռուպցիա: «Սա այն գլոբալ խնդիրներն են, որոնք չլուծելով մեր երկիրը շարունակելու է նահանջել ու եթե աճը լինի 3-6 տոկոս, բան չի փոխվելու: Եթե տնտեսական ակտիվության ցուցանիշը 3 տոկոս է, ապա անհասկանալի է, թե ինչու է աղքատությունն աճում, ինչու են մարդիկ փախչում երկրից»,-ասաց նա:
Ասատրյանի խոսքով, դեռ մեկ տարի առաջ ինքը կանխատեսել է, որ Հայաստանի տնտեսությունը կանգնած է երկնիշ տնտեսական անկման առջեւ, որի նախադրյալներն են տրանսֆերտների կրճատումը, ներդրումների նվազումը եւ այլն:
«2014-ին գյուղատնտեսական համախառն արտադրանքի ծավալը կազմել է 993 մլրդ դրամ, իսկ 2015-ին, 1,002 տրլն դրամ, այսինքն աճը կազմել է ընդամենը 9 մլրդ դրամ, ինչը մեկ տակոսից ավելի չէ, մինչդեռ խոսվում է 11,1 տոկոս աճի մասին:
Դոլարային արտահայտությամբ արդյունաբերական արտադրանքի ծավալը 2015-ին նախորդ տարվա համեմատ նվազել է 10,3 տոկոսով, գյուղմթերքների արտադրանքի ծավալը՝ 12,2 տոկոսով, շինարարության ծավալները՝ 8,2 տոկոսով»,- ընդգծել է տնտեսագետն ու հավելել, որ Հայաստանի տիպի երկրների համար 3 տոկոսանոց աճն այն աճը չէ, որ կարող են բնութագրել որպես զարգացում: