ՀՀԿ-ն այսօր՝ փետրվարի 4-ին, տեղի ունեցած Գործադիր մարմնի նիստում կոալիցիայի, համագործակցության հետ կապված հարց չի քննարկել։ Այս մասին նիստից հետո լրագրողների հետ զրույցում ասաց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը։
«Քննարկումները շարունակվում են։ Մինչեւ մյուս շաբաթվա ավարտ մենք կունենանք հստակություն։ ԳՄ-ի նիստում որեւէ քննարկում այս հարցի շուրջ չի եղել։ Թե ՀՀԿ-ի, թե ՀՅԴ-ի համար համագործակցության հիմքը ոչ թե պաշտոնների բաժանումն է, այլ գաղափարախոսությունը, ծրագրային դրույթները»,- ասաց Շարմազանովը։
ՀՀԿ մամուլի խոսնակի խոսքով՝ իրենք այսօր քննարկել են նոր Ընտրական օրենսգիրքը։
Նշենք, որ արդեն քանի օր է՝ տեղեկություններ էին պտտվում, որ այսօրվա նիստում կոալիցիա կազմելու որոշում պետք է կայացվեր։
