Ըստ էության, տարբերություն չկա ՀՀԿ-ՀՅԴ կոալիցիա կստեղծվի թե ոչ, քանի որ ՀՀԿ-ն, միեւնույն է, ունի բացարձակ մեծամասնություն խորհրդարանում: Այս մասին, այսօր՝ փետրվարի 5-ին, լրագրողների հետ հանդիպման ժամանակ նշել է Քաղաքական եւ միջազգային հետազոտությունների հայկական կենտրոնի տնօրեն, քաղաքագետ Աղասի Ենոքյանը:
Նա համոզմունք հայտնեց, որ ՀՅԴ-ն անշուշտ կգնա կոալիցիա կազմելու տարբերակով: «Դաշնակցությունը ինչ էլ, որ ասի, ենթադրենք՝ ասում է, որ գնում է համագործակցության կամ կոալիցիայի հայրենիքը փրկելու համար, սա մի քիչ ռոմանտիկ մոտեցում է: Ասում են, որ անգամ վարկաբեկվելու գնով գնում են հայրենիքը փրկելու: Իրականությունը կարծես թե իշխանական կերակրատաշտի մոտ թույլատրվում է տեղ ունենալ, իրենք հաճույքով գնում եւ օգտվում են այդտեղից: Այստեղ Դաշնակցության մոտիվացիան ավելի քան պարզ է»,-ասաց Ենոքյանը՝ հավելելով, որ այդ դեպքում ՀՅԴ-ն մոտ կլինի ոչ միայն բյուջեին, այլեւ մարզպետարաններին ու մարզերի ձայներին:
Անդրադառնալով հարցին, թե իսկ ՀՀԿ-ի ինչի՞ն է պետք ՀՅԴ-ի հետ կոալիցիան, եթե առանց այդ էլ ունի մեծամասնություն, քաղաքագետը նշեց, որ տարբերակներից մեկն այն է, որ այդկերպ ՀՀԿ-ին կիսում է իշխանության պատասխանատվությունը, բայց «պատասխանատվությունը ամբողջովին Հանրապետականի վրա է, այնպես որ պատասխանատվություն կիսելու տարբերակ չկա»:
Ինչ վերաբերում է վարկածին, որ Սերժ Սարգսյանին պետք են սփյուռքի կառույցները, Ենոքյանը դա եւս թույլ վարկած որակեց՝ նշելով. «Սփյուռքը կարծես թե միշտ էլ Հայաստանից տրվող հրահանգները կատարում է»:
«Սենտիմենտալություն է նաեւ այն տեսակետը, թե այսպիսով Սերժ Սարգսյանը վարձահատույց է լինում, որ Դաշնակցությունը գնաց ընդդիմադիր քառյակի քանդմանը, որովհետեւ ՀՅԴ-ն արդեն արել է իր գործը, վարձահատույց լինելու կարիք չկա»,- ասաց քաղաքագետը:
Նրա խոսքով, ամենալուրջ գործոնն այն է, որ ՀՅԴ-ին կոալիցիա բերելով, Սերժ Սարգսյանը Ռոբերտ Քոչարյանի «տակից հանում է» քիչ, թե շատ լուրջ քաղաքական պլատֆորմը, որով նա կկարողանա գնալ ընտրությունների: «Այսինքն՝ եթե Քոչարյանը ուզում է մասնակցել ընտրություններին, ստիպված է հույսը դնել 1-2 հոգանոց կուսակցությունների վրա»,-ամփոփել է նա: