Կրեմլը հայտնել է, որ ՌԴ նախագահ Վլադիմիր Պուտինի եւ Թուրքիայի նախագահ Ռեջեփ Թայիփ Էրդողանի միջեւ վերջին ժամանակներս շփում չի եղել եւ չի պլանավորվում։ Էրդողանը Պուտինին առաջարկել էր հանդիպել Սու-34 օդանավի նոր միջադեպից հետո։
«Ոչ, Ռուսաստանի եւ Թուրքիայի նախագահների միջեւ որեւէ շփում չի եղել։ Ես տեղեկություններ չունեմ նաեւ նման պլաններ ունենալու մասին»,- ասել է Պուտնի խոսնակ Դմիտրի Պեսկովը, փոխանցում է «Ինտերֆաքս»-ն։
Նշենք, որ հունվարի 30-ին Էրդողանը ռուսական օդանավի հետ կապված հերթական միջադեպի կապակցությամբ հայտնել էր Պուտինի հետ հանդիպելու անհրաժեշտության մասին։ Նրա խոսքով՝ ինքը Թուրքիայի ԱԳՆ-ին խնդրել է իր ցանկությունը հայտնել Մոսկվային։
Նշենք, որ Թուրքիայի ԱԳՆ-ն հայտարարություն էր տարածել այն մասին, որ հունվարի 29-ի առավոտյան ռուսական ռազմատիզերական ուժերի Սու-34 օդանավը խախտել է իր երկրի օդային սամանը։ Անկարայից հայտնել էին, որ օդանավի անձնակազմին մի քանի անգամ զգուշացրել են սահմանին մոտենալու մասին։
Թուրքիայի արտգործնախարար Մեվլութ Չավուշօղլուն հայտնել էր, որ Անկարան ռազմական ճանապարհով Մոսկվային ապացույցներ է ներկայացրել, որ Սու-34-ը հատել է Թուրքիայի օդային սահմանը, սակայն ՌԴ ԱԳՆ-ն այդ տեղեկությունը հերքել էր։
