ՄԱԿ-ը չի պատրաստվում նոր հրավերներ ուղարկել սիրիական կարգավորման բանակցությունների հաջորդ փուլի համար կամ փոխել դրանց ձեւաչափը, հայտնում է Ռոյթրզ գործակալությունը` վկայակոչելով Սիրիայի խնդրով ՄԱԿ-ի հատուկ դեսպանորդի տեղակալ Ռամզի Էզելդին Ռամզիին:
«Այլ հրավերներ չեն լինի: Այլ ձեւաչափում նոր հրավերներ չեն ուղարկվի», — հայտնել է նա, տեղեկացնում է «ՌԻԱ Նովոստին»:
Սիրիայի կառավարության եւ սիրիական ընդդիմության միջեւ բանակցությունները սկսվել են հունվարի 29-ին: Դրանք անցկացվում են ՄԱԿ-ի Անվտանգության Խորհրդի թիվ 2254 որոշմանը համապատասխան: Ակնկալվում է, որ բանակցությունները վեց ամիս կտեւեն: Ավելի վաղ Սիրիայի հարցով ՄԱԿ-ի հատուկ դեսպանորդ Ստեֆֆան դե Միստուրան հայտնել էր, որ Ժնեւում միջսիրիական բանակցություններում ժամանակավոր դադար է, նոր փուլը նախատեսված է փետրվարի 25-ին: