Հյուսիսային Կորեայի իշխանություններն արբանյակով հրթիռի արձակման ժամկետը փետրվարի 14-ից տեղափոխել են 7-ի, այսինքն՝ մեկ շաբաթ ավելի շուտ: Այս մասին ասված է միջազգային կազմակերպությունների համար տարածված տեղեկությունում:
Փետրվարի 2-ին հայտնի դարձավ, որ Փհենյանն Էլեկտրակապի միջազգային միությանն ու Ծովային միջազգային կազմակերպությանը տեղեկացրել է փետրվարի 8-25-ն ընկած ժամանակահատվածում Երկրի արհեստական արբանյակ արձակելու մտադրության մասին: Այս մասին գրում է ՏԱՍՍ-ը:
Reuters-ը, վկայակոչելով ճապոնական լրատվամիջոցներին, հաղորդում է, որ հիմա Ճապոնիան եւ Հարավային Կորեան արբանյակի արձակմանը սպասում են հաջորդ շաբաթ:
Ճապոնիայում լրջորեն են պատրաստվում Հյուսիսային Կորեայի կողմից հրթիռի արձակմանը: Երկրի պաշտպանության նախարարությունը հաղորդել է, որ բազմաֆունկցիոնալ մարտական տեղեկատվական-կառավարման Aegis համակարգով հագեցած երեք նավ են ուղարկել՝ հրթիռի հնարավոր արձակմանը հետեւելու համար:
Հրթիռի արձակմանը պատրաստվում են նաեւ մասնավոր ընկերությունները: Ճապոնական խոշորագույն Japan Airlines եւ All Nippon Airways ավիաընկերությունները փոխել են իրենց մի քանի ինքնաթիռների թռիչքների երթուղին, որոնք կարող են խաչվել հրթիռի թռիչքի հնարավոր ուղու հետ:
