Շփման գծում փետրվարի 5-ին զոհված ժամկետային զինծառայող, 20-ամյա Սիմոն Ճավռշյանին դպրոցում ճանաչում էին որպես խելոք, համեստ, կարգապահ եւ նախաձեռնող տղայի:
Սիմոնի մասին նրա համադասարանցիները թեեւ ցավով, բայցեւ ժպիտով են հիշում:
«Մեր կատարած չարաճճիությունների պատասխանատվությունը միշտ նա էր վերցնում իր վրա: Հիշում եմ` 8-րդ դասարանում փախել էինք դասարանով, հաջորդ օրը Սիմոնը մեղքը վերցրեց իր վրա, որ մենակ պատիժը կրի. իբր ինքն է կողպել դասարանի դուռը, որ մենք ներս չմտնենք»,- NEWS.am-ի հետ զրույցում պատմում է Սիմոնի դասընկերուհին՝ Եվգինե Սեւոյանը:
Դասընկերներից մյուսն էլ` Արեւիկ Սահրադյանը, հիշում է . «Հեռու տեղ էքսկուրսիա գնալիս դասարանի աղջիկների համար Սիմոնը պաշտպանի պես էր: Միշտ մեջքներիս կանգնած էր, որ հանկարծ ինչ-որ մեկը չնեղացնի մեզ, չասի` աչքիդ վերեւն ունք կա»:
Արեւիկը պատմում է՝ 12-րդ դասարանում՝ վերջին դասի օրը, դասարանի ամբողջ զարդարանքը Սիմոնը մենակ էր արել`«բոլոր փուչիկները հատ-հատ փչել, կպցրել, սարքել էր»:
Փանիկի միջնակարգ դպրոցի հայոց լեզվի եւ գրականության ուսուցչուհի Ժենիկ Սահակյանը, որը 8 տարի Սիմոնի դասղեկն է եղել, իր սանի մասին միայն լավն է հիշում:
«Մինչեւ 8-րդ դասարանը գերազանց էր սովորում, հետո որոշեց, որ պետք է արհեստ ձեռք բերի, մտածեց` դրանով կարող է իր ընտանիքը պահել: Ճիշտ է` ընտանիքը նեղության մեջ էր, բայց նրան հատուկ կերպով լավ էին նայում, մայրն առանձնահատուկ ջերմությամբ էր Սիմոնին վերաբերվում»,-ասում է Ժենիկ Սահակյանը:
Դասղեկը ժպիտով հիշում է` գյուղ արձակուրդ գալիս Սիմոնն առաջինը դպրոց էր գնում, նախ` ուսուցիչներին էր տեսնում, ապա ընկերներին հանդիպում, հետո միայն տուն գնում:
«Ինչպես միշտ էր կազմակերպիչ, այնպես էլ հիմա իր մահով ընկերներին ու ուսուցիչներին համախմբեց իր շուրջը»,- հուզմունքը չկարողանալով զսպել` ասում է Ժենիկ Սահակյանը:
Նշենք, որ Սիմոն Ճավռշյանի հոգեհանգիստը տեղի կունենա փետրվարի 7-ին Շիրակի մարզի Փանիկ գյուղում գտնվող իրենց տանը:
Ավելի վաղ NEWS.am-ը հայտնել էր, որ փետրվարի 5-ի գիշերը՝ ժամը 03.55-ի սահմանում ՊԲ հարավային ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու հրազենային վիրավորում է ստացել ՊԲ զինծառայող, 1996թ. ծնված Սիմոն Ռաֆիկի Ճավռշյանը:
ԼՂՀ նախագահ Բակո Սահակյանը փետրվարի 5-ին ստորագրել է հրամանագիր, համաձայն որի՝ Լեռնային Ղարաբաղի Հանրապետության պետական սահմանը պաշտպանելիս ցուցաբերած արիության համար ԼՂՀ պաշտպանության բանակի N զորամասի շարքային Սիմոն Ճավռշյանը հետմահու պարգեւատրվել է «Մարտական ծառայություն» մեդալով: 20-ամյա Սիմոնը գարնանը պետք է զորացվեր:
