Հայաստանի զարգացման հիմնադրամի աջակցությամբ փետրվարի 8-12-ը հայկական 21 ընկերություններ մեկ միասնական տաղավարով մեր երկրի սննդարդյունաբերության ոլորտը կներկայացնեն Մոսկվայում տեղի ունեցող «Պրոդ Էքսպո-2016» միջազգային ցուցահանդեսին:
Այն սննդի, խմիչքների եւ սննդային հումքի 23-րդ միջազգային ամենամյա ցուցահանդեսն է, որը ճանաչված եւ ընդունված է արտադրողների, հատկապես խոշոր գնորդների ու ներմուծողների շրջանում: «Պրոդ Էքսպո»-ին տարեկան մասնակցում է շուրջ 2000 կազմակերպություն՝ ավելի քան 65 երկրից, այցելում ավելի քան 30 000 մարդ:
Հայկական ընկերությունները միասնական տաղավարում ներկայացնում են արտադրանքի հարուստ տեսականի. մրգային եւ բանջարեղենային պահածոներ, հյութեր, կոմպոտներ, ըմպելիքներ, մուրաբաներ, ջեմեր, թթու, մարինացված բանջարեղեն, թարմ եւ մարինացված սունկ, գարեջուր, խմելու աղբյուրի շշալցված ջուր, խաղողի կորիզի, նռան հատիկի եւ կտավատի յուղ, մսամթերք, մսի ու ձկան պահածոներ, թեյի տեսակներ, մեղր, ընդեղեն, չրեղեն, ալկոհոլային խմիչքներ՝ մրգային բրենդիներ եւ օղիներ, կոնյակ, գինի, վիսկի:
«Այսօր Հայաստանը ռուսական մեծ շուկային կարող է առաջարկել սննդարդյունաբերության ընդգրկուն տեսականի, իսկ այսպիսի միջոցառումները ամենակարճ ճանապարհն են մեծածախ գնորդներին հայկական արտադրանքը լավագույնս ներկայացնելու, գործարար կապեր ստեղծելու համար: Նման ցուցահանդեսների ժամանակ մեր ընկերությունները հնարավորություն են ունենում նաեւ ծանոթանալու ոլորտի նորություններին եւ զարգացման միտումներին»,- նշել է Հայաստանի զարգացման հիմնադրամի գործադիր տնօրեն Արման Խաչատրյանը: