Արարատի մարզում 2015թ. մարտի 14-ի երեկոյան «Շտապօգնության» մեքենայի մասնակցությամբ ողբերգական ավտովթարի գործով մեղադրյալ, «Շտապօգնության» վարորդ Հ. Կարապետյանն իրեն առաջադրված մեղադրանքը չի ընդունում: Այս մասին NEWS.am-ին ասաց Արտաշատի բժշկական կենտրոնի տնօրենի բուժգծով տեղակալ Աշոտ Գեւորգյանը:
«Սպասում ենք դատաքննության ավարտին, որից հետո մենք որոշում կկայացնենք: Բայց դեռեւս նա շարունակում է մեր աշխատակիցը մնալ, նրա գործունեությունը չենք կասեցնելու, թեեւ վթարից հետո գործի չի գալիս: Ողնաշարի հետ կապված ցավեր ունի, մեքենա վարել չի կարողանում: Բացի դրանից, հոգեբանական խնդիրներ էլ ունի»,- ասաց Աշոտ Գեւորգյանը:
Փոխտնօրենի խոսքով՝ Հ. Կարապետյանը երկար տարիներ աշխատել է իրենց հիվանդանոցում:
Նշենք, որ գործով նախաքննությունն ավարտվել է, գործն ուղարկվել է նախաքննության օրինականության նկատմամբ հսկողություն իրականացնող դատախազին: Ըստ ՔԿ-ի՝ Կարապետյանին մեղադրանք է առաջադրվել Քրեական օրենսգրքի 242-րդ հոդվածի 2-րդ մասով:
NEWS.am-ի տեղեկություններով՝ վարորդը դեպքի օրն ալկոհոլի ազդեցության տակ է եղել եւ այդպես նստել ղեկին:
Ավելի վաղ NEWS.am-ը հայտնել էր, որ 2015թ. մարտի 14-ին Արարատի մարզի Արտաշատ քաղաքից դեպի Վերին Արտաշատ գյուղ տանող ճանապարհին դեռեւս չպարզված հանգամանքներում բախվել են «Շտապօգնության» ծառայության «Ֆորդ» եւ «ԳԱԶել» մակնիշների ավտոմեքենաները: Վթարի հետեւանքով շտապօգնության բժիշկ, 27-ամյա Կարապետ Գրիգորյանը մահացել է: Երկու մեքենաների վարորդներն ու ուղեւորները տեղափոխվել են հիվանդանոց:
Դեպքի առթիվ հարուցվել է քրեական գործ ՔՕ 242-րդ հոդվածի 2-րդ մասի հատկանիշներով: