Վանաձորում բացօթյա առեւտրով զբաղվողները բողոքում են հարկային դաշտ մտնել պարտադրող օրենքի դեմ: Առեւտրականները, որոնց օրեր առաջ զգուշացրել են, որ ըստ առեւտրի եւ ծառայությունների մասին օրենքի՝ չեն կարող բացօթյա առեւտուր իրականացնել առանց հարկային դաշտ մտնելու, այսօր՝ փետրվարի 8-ին, հավաքվել էին Վանաձորի քաղաքապետարանում՝ իրենց բողոքը հայտնելու:
Բողոքող առեւտրականներին ընդունեց Վանաձորի քաղաքապետ Սամվել Դարբինյանը, որից նրանք հետաքրքրվեցին՝ որն է պատճառը, որ 2004թ. գործող օրենքի պահանջները միայն հիմա են դրվում կիրառության:
«Մինչեւ հիմա մեզնից էդպես պատասխանատու ձեւով չէր պահանջվում: Եթե մենք ապրում ենք մի պետությունում, պիտի էդ պետության օրենսդրությանը ենթարկվենք: Կամ պիտի լրիվ փողոցային առեւտուրը փակենք, կամ բերենք օրենսդրական դաշտ»,- պատասխանեց քաղաքապետը:
Սամվել Դարբինյանը խոստացավ, որ խնդիրը կուսումնասիրեն ու մեկ շաբաթից կտեղեկացնեն, թե հետագա գործունեություն ծավալելու ինչ տարբերակներ կան, իսկ մինչեւ այդ առեւտրականներին թույլատրվեց շարունակել բացօթյա առեւտուր իրականացնել:
Օրենքի կիրառությունը, առեւտրականների խոսքով, իրենց կկանգնեցնի փաստի առջեւ, այլեւս չեն կարողանա աշխատել, քանի որ առեւտրից շատ քիչ եկամուտ են ստանում:
«Եթե ես փող ունենամ, ապրելու միջոց ունենամ, 78 տարեկան մարդ եմ, չեմ գնա ձնի, անձրեւի տակին կանգնի, որ իմ կոմունալ վարձերի փողը առնեմ, որ չգան իմ տունը առգրավեն: Պտի կանգնեմ, թող միլիցեն գա, իմ դրած միրգը ոտնատակ անի, ցրի: Ամբողջ օրը կանգնում ենք, մի մարդ չի անց կենում, որ մի կիլո միրգ առնի: Հաշվիչով աշխատենք, դա նույնն է, որ թողնենք՝ մեր ընտանիքները սոված մնան»,- NEWS.am-ի հետ զրույցում դժգոհեց առեւտրականներից Ֆուրման Ալավերդյանը:
Նշենք, որ քաղաքի տարածքում բացօթյա առեւտուր իրականացնողները մինչ այժմ աշխատել են՝ համայնքային բյուջե վճարելով տեղական տուրք՝ 1 քմ-ի համար 400 դրամ: