Հայաստանը շահագրգռված է ԵԱՀԿ/ԺՀՄԻԳ-ի հետ համագործակցության հարցում: Այս մասին հայտնել է ՀՀ ԱԳՆ ղեկավար Էդվարդ Նալբանդյանը փետրվարի 9-ին Երեւանում Շվեդիայի արտգործնախարար Մարգոտ Վալստրյոմի հետ համատեղ մամուլի ասուլիսի ժամանակ:
Պատասխանելով սահմանադրական բարեփոխումների վերաբերյալ վերոնշյալ կառույցի ներկայացրած զեկույցի մասին հարցին՝ նախարարը նշեց, որ ԺՀՄԻԳ-ը հանրաքվեների մոնիտորինգով չի զբաղվում, քանի որ կազմակերպության անդամները համապատասխան պարտավորություններ չեն ստանձնել: «Բայցեւայնպես Հայաստանը ԺՀՄԻԳ-ին հրավիրել էր հանրաքվեի մոնիտորինգ անցկացնել մեկ նպատակով՝ որպեսզի գործընթացն հնարավորինս թափանցիկ դառնա: Մոնրիտորինգի ժամանակի ու ձեւաչափի առումով լիակատար ազաատություն էր տրամադրվել: ԺՀՄԻԳ-ը 4 դիտորդների էր ուղարկել կարճ ժամանակով: Ի լրումն ԿԸՀ նախագահի ու այլ պաշտոնատար դեմքերի մեկնաբանությունների՝ ասեմ, որ մեզ ուղղված նամակում կազմակերպությունը բարձր է գնահատում Հայաստանի հետ արդյունավետ համագործակցությունը ու հույս ունի, որ զեկույցում նշված առաջարկությունները հաշվի կառնվեն, կշարունակվի ընտրական համակարգի բարելավմանն ուղղված համագործակցությունը: Հայաստանը շահագրգռված է համագործակցությունը շարունակելու հարցում»,- վստահեցրել է ԱԳՆ ղեկավարը:
