Այն պայմանագրերը, որ Հայաստանը կնքել է ԱՄՆ-ի հետ, նպաստելու են ներդրումների ավելացմանը: Այս մասին այսօր՝ փետրվարի 9-ին լրագրողների հետ հանդիպմանն ասաց ԱԺ ՀՀԿ խմբակցության պատգամավոր Կարինե Աճեմյանը՝ նշելով, որ իշխանությունները պետք է ներդրումների համար բարենպաստ պայմաններ ստեղծեն եւ կիրթ ու գրագետ պայքարեն կոռուպցիայի դեմ:
«Դրամաշնորհներն ուղղված են մեր երկրում կոռուպցիայի դեմ պայքարին: Կառավարությունն ամեն ինչ արել է, որ կոռուպցիայի դեմ պայքարող հանձնաժողովը ճիշտ աշխատի, բազմաթիվ ծրագրեր են մշակվել, ակտիվ աշխատում է հանձնաժողովը: Բոլոր ուղություններով ամեն ինչ արվում է, հետեւողական աշխատանքի արդյունքում անպայման արդյունքներ կլինեն»,- ասաց Կարինե Աճեմյանը:
Հանդիպմանը ներկա, «Ազատ դեմոկրատներ» կուսակցության փոխնախագահ Անուշ Սեդրակյանն էլ նշեց, որ դրամաշնորհները չեն ծառայում իրենց նպատակին:
«Հակակոռուպցիոն բոլոր միջոցառումներն ուղղված են նրան, որ հանրությունը տեղյակ լինի կոռուպցիոն հիմնական հոսքերից, բայց Հայաստանում այդպես չէ: Հիմա եթե Հայաստանում ասեն՝ կոռուպցիոն ինչ օրինակ գիտես, շատ քչերը կասեն մենաշնորհային քաղաքականությունը: Ընդհանուր առմամբ մենք միայն ասում ենք՝ գռփում են, թալանում են, դրամաշնորհները տանում են»,- նշեց նա:
Նշենք, որ ԱՄՆ նախագահ Բարաք Օբաման նշել էր, որ 2015թ. Հայաստանում ԱՄՆ ներդրումների ծավալի պատմական մակարդակի բարձրացումը միայն սկիզբն է մեծածավալ առեւտրային ու ներդրումային կապերի, որոնք առանցքային նշանակություն ունեն ինչպես Հայաստանի, տարածաշրջանի համար, այնպես էլ՝ դրանից դուրս:
