ՀՀ տնտեսական մրցակցության պաշտպանության պետական հանձնաժողովը ԱԺ անկախ պատգամավոր Էդմոն Մարուքյանի դիմումի համաձայն «Վեգա» էլեկտրատեխնիկայի խանութների ցանցի նկատմամբ վարչական վարույթ է հարուցել: Այս մասին Facebook-ի իր էջում գրել է պատգամավորը:
«Այսօր առավոտյան ստացել եմ հանձնաժողովի նախագահ՝ Արտակ Շաբոյանի պատասխանն առ այն, որ հանձնաժողովը հարուցել է վարույթ, ինչպես նաեւ հրավիրվել եմ հանձնաժողովի՝ փետրվարի 22-ի դռնբաց նիստին, որտեղ քննարկվելու է դիմումի հիման վրա հարուցված վարչական վարույթում առկա փաստական հանգամանքների վերաբերյալ հարցը»,-գրել է Մարուքյանը:
Նշենք, որ փետրվարի 3-ին Էդմոն Մարուքյանը դիմել էր ՀՀ տնտեսական մրցակցության պաշտպանության պետական հանձնաժողով՝ առաջարկելով հարուցել վարչական վարույթ «Վեգա» էլեկտրատեխնիկայի խանութների ցանցի նկատմամբ եւ խախտումներ հայտնաբերելու դեպքում օրենքով սահմանված կարգով լուծել պատասխանատվության հարցը:
Պատգամավորն իր դիմումում, մասնավորապես, նշել էր. «Վեգա» էլեկտրատեխնիկայի խանութների ցանցը հունվար ամսին հաղորդագրություններ է տարածել իր ապրանքների ամբողջ տեսականին ինքնարժեքով վաճառելու վերաբերյալ: Սակայն, այցելելով Երևանի Զեյթուն համայնքում գտնվող «Վեգա» խանութի մասնաճյուղը, հայտնաբերել եմ, որ հաղորդագրությունը չէր համապատասխանում իրականությանը, քանի որ ակնհայտ էր, որ վաճառքի գները որևէ կերպ չէին կարող ինքնարժեք լինել:
Նշեմ նաև, որ ինքնարժեքը, որպես տնտեսագիտական կատեգորիա, դրամական ձևով արտահայտում է բացառապես ապրանքի արտադրության (ձեռքբերման) և իրացման վրա կատարված ձեռնարկության ընթացիկ ծախսերը։ Այսինքն, որևէ այլ ծախս ինքնարժեքի մեջ հաշվարկվել չի կարող և ենթադրում է ապրանքի հավելյալ արժեք:
Նշված փաստերը համապատասխանում են հասարակությանը մոլորեցնելու և հետևաբար նաև անբարեխիղճ մրցակցության սահմանումներին: Ընդ որում, նշվածը Հանրապետությունում տարածված պրակտիկա է»:
