Կարմիր խաչի միջազգային կոմիտեն պաշտոնական տեղեկություններ չունի Ադրբեջանում մեծ թվով հայ գերիների մասին։ Այս մասին NEWS.am-ի հարցմանն ի պատասխան՝ ասել են ԿԽՄԿ երեւանյան պատվիրակությունից։
Նախօրեին Ադրբեջանի փախստականների եւ հարկադիր տեղահանվածների հարցերով պետական հանձնաժողովի ղեկավար Ալի Հասանովը հայտնել էր, որ Ադրբեջանում մեծ թվով հայ գերիներ կան։
«ԿԽՄԿ տվյալներով՝ այս պահին Ադրբեջանում կա մեկ հայ ռազմագերի։ ԿԽՄԿ ներկայացուցիչները այցելում են նրան, նա հնարավորություն ունի հարազատների հետ ընտանեկան բնույթի տեղեկություններ փոխանակել։ Այլ գերիների մասին պաշտոնական տեղեկություններ ԿԽՄԿ-ն չունի»,- ասել են ԿԽՄԿ երեւանյան պատվիրակությունից։
Հիշեցնենք, որ միակ գերին Լեռնային Ղարաբաղի Հանրապետության քաղաքացի Արսեն Բաղդասարյանն է։
Նրանից բացի, ադրբեջանական կողմում է գտնվում Հայաստանից փախած Վահան Մարտիրոսյանի ընտանիքը։ Նրանք հարեւան երկրում են հայտնվել բավական տարօրինակ հանգամանքներում եւ, ըստ ամենայնի, կամավոր։ Այդ ընտանիքը գերու կամ պատանդի կարգավիճակ չունի։
Հայաստանի գերիների, պատանդների եւ անհետ կորածների հարցերով հանձնաժողովի աշխատանքային խմբի ղեկավար Արմեն Կապրիելյանը նախօրեին հայտնել էր, որ հայկական կողմը գործադրում է բոլոր ջանքերը ադրբեջանցի պաշտոնյայի հայտարարության ֆոնին իրավիճակը պարզելու համար։