Օգտակար հանածոների արդյունահանման հարկում (ՕՀԱՀ) ու ակցիզում կատարված փոփոխությունները կարող են գնային ճնշում ունենալ ռուսական բենզինի վրա: Այս մասին NEWS.am –ի թղթակցին հայտնել է Ռուսաստանի վառելիքային միության նախագահ Եվգենի Արկուշան:
Գների վրա հիմնականում կարող է ազդել նավթի արդյունահանման ժամանակ ՕՀԱՀ թույլատրելի պահումների կրկնակի կրճատումը (պահումը թույլատրվում է արդյունահանման տեխնիկական պահանջների ու անվտանգության ծախսերի համար ու հիմա կազմում է բարելի դիմաց 15 դոլար): Ֆինանսների նախարարության 2015 թ. հաշվարկներով ՕՀԱՀ բարեփոխումը պետք է բյուջեին մոտավորապես 600 մլրդ ռուբլու եկամուտ բերեր, իսկ ակցիզի բարձրացումը՝ եւս 80 մլրդ: Բենզինի ակցիզն առաջարկում են բարձրացնել լիտրի դիմաց 2 ռուբլով, իսկ դիզելինը՝ 1 ռուբլով: Համեմատության համար ասենք, որ հիմա մոսկովյան բենզալցակայաններում «ԱԻ-95» տեսակի մի լիտր բենզինը միջինը 36-37 ռուբլի է։
Բնականաբար, այս ամենը կազդի բենզինի գնի վրա: Դրա համար էլ գները կարող են հարկերի պատճառով բարձրանալ, նույնիսկ երբ նավթն էժանանանում է»,- հավելել է Արկուշան:
Նշված նախաձեռնությունները դեռ Պետդումա չեն մտել ու գտնվում են քննարկման փուլում:
Հիշեցնենք, որ ռուսական նավթամթերքները Հայաստանի շուկայում հիմնական տեղն են զբաղեցնում: Հայ-ռուսական միջկառավարական համաձայնագրով, որը կնքվել է 2013 թ. դեկտեմբերին, Հայաստանը կարող է ՌԴ-ից նավթամթերք գնել՝ առանց արտահանման ռուսական մաքսատուրքի: Դրա շնորհիվ, եթե 2013 թ. ռուսական նավթամթերքների ներմուծումը 96.4 մլն դոլար էր կազմել (նավթամթերքի ներմուծման արժեքում տեսակարար կշիռը՝ 28 տոկոս), ապա 2014 թ. արդեն 213 .6 մլն դոլար էր, կամ 66 տոկոս:
