IBM Watson գերհամակարգչին առաջարկել են առաջադրվել ԱՄՆ նախագահի պաշտոնում: Նախաձեռնող խումբն արհեստական ինտելեկտի նախընտրական ծրագիրը ներկայացրել է իր կայքում՝ համարելով, որ մեքենան կարող է ավելի հավասարակշռված եւ օբյեկտիվ քաղաքական որոշումներ ընդունել, քան մարդը:
Ըստ Lenta-ի, 2011 թվականին «Jeopardy!» հեռուստավիկտորինայի ընթացքում մարդուն հաղթելուց հետո գերհամակարգիչը շարունակել է զարգանալ: Մասնավորապես, IBM-ը համակարգչին բժշկություն է սովորեցրել: Արդյունքում, օրինակ, Նյու Յորքի քաղցկեղի բուժման Սլոան-Քեթերինգ կենտրոնում բուժքույրերը 90%-ով կատարում են համակարգչի հրահանգները:
«Մենք հավատում ենք, որ տեղեկությունները համակարգելու եւ թափանցիկ որոշումներ կայացնելու՝ Watson-ի եզակի ունակությունները նրան նախագահի կատարյալ թեկնածու են դարձնում»,- ասված է կայքում:
Գերհամակարգիչը համընդհանուր պետական բժշկական ապահովագրություն, անվճար բարձրագույն կրթություն եւ թեթեւ թմրանյութերի օրինականացում է քարոզում: Բացի այդ, Watson-ը պահանջում է մաքուր էներգիային անհապաղ անցում:
