Թուրքիայի եւ ԱՄՆ-ի միջեւ տարաձայնությունների սաստկացումը նոր դրսեւորումներ է սtանում` կապված այն բանի հետ, որ ԱՄՆ-ը չի շտապում բացատրություններ տալ քրդական հարցի վերաբերյալ իր դիրքորոշման մասին, գրում է The Voice of Americа-ն` նշելով, որ դաշնակիցների միջեւ հարաբերությունների ճգնաժամը կարող է երկար տեւել:
Տարաձայնությունների սրման հերթական փուլը դարձավ ԱՄՆ-ի դեսպան Ջոն Բասսին Թուրքիայի ԱԳՆ կանչելը: Այդպես Անկարան արձագանքել է ԱՄՆ-ի Պետքարտուղարության ներկայացուցիչ Ջոն Քիրբիի հայտարարությանը, որն ասել էր, որ Միացյալ Նահանգները սիրիական քրդերի կուսակցությունը ահաբեկչական չեն համարում եւ վստահ են, որ նրա անդամները ԻՊ-ի դեմ «արդյունավետորեն պայքարող մարտիկներ» են: Ինչպես պարբերականին հաղորդել է դիվանագիտական շրջանակներից թուրք պաշտոնյան, Անկարան ծայրաստիճան անհանգստացած է Վաշինգթոնի նման հայտարարություններով, տեղեկացնում է «ՌԻԱ Նովոստին»:
Քանի որ թուրքական կառավարությունը հայտնել է, որ քրդական «Ժողովրդական միություն» կուսակցությունը եւ Քուրդիստանի բանվորական կուսակցությունն ավելի մեծ վտանգ են ներկայացնում, քան ԻՊ-ը, Թուրքիայի եւ ԱՄՆ-ի քաղաքական նպատակների միջեւ հակասությունները գնալով ավելի ակնհայտ են դառնում եւ երկրների միջեւ լարվածությունն աճում է, ընդգծում է հոդվածի հեղինակը:
Վաշինգթոնը չի ուզում հրաժարվել քրդերի հետ համագործակցությունից, որովհետեւ դա ծայրաստիճան կարեւոր է ամերիկյան մերձավորարեւելյան քաղաքականության համար: Միացյալ Նահանգները չեն կարող թույլ տալ, որ քրդերը միավորվեն Ռուսաստանի հետ եւ Մոսկվան տարածաշրջանում ազդեցության լրացուցիչ գործիք ստանա: Միաժամանակ Անկարան իր բոլոր գործողություններով հող է ստեղծում իրադարձությունների նման զարգացման համար, ասված է հոդվածում:
Չնայած ԱՄՆ-ը փորձում է Թուրքիայի հետ դաշնակցային հարաբերությունները պահպանել նախկին մակարդակում, գիտակցում է, որ Անկարան անհուսալի եւ անկանխատեսելի դաշնակից է, որի վրա չարժե լրջորեն հույս դնել: Քրդական հարցով հակասությունները որոշիչ են դարձել երկու երկրների միջեւ հարաբերությունների զարգացման համար, որոնք առանց այն էլ վերջերս դեպի վատն են փոխվել, եզրափակում է The Voice of America-ն:
