Արագածոտնի մարզի Արագածավան գյուղում փետրվարի 3-ի աղմկալի սպանությունից հետո մեկ շաբաթ է անցել, սակայն գյուղը դեռեւս հսկվում է ոստիկանական ուժերի կողմից:
Կալանավորված 35-ամյա Սեդրակ Ղազարյանի հնչեցրած կրակոցներից անմիջապես հետո գյուղում հրկիզվել էին Ղազարյանի հետ մտերմական կապ ունեցող գյուղացիների գույքը, որի մեջ կասկածվում է սպանված եւ հրազենային վիրավորում ստացած Արտյոմ եւ Արման Խամոյանների եղբայրը` Աշոտ Խամոյանը:
Ողբերգության շարունակությունը կանխելու նպատակով դեպքից հետո Արագածավանում ուժեղացված հսկողություն են իրականացնում ոստիկանական ուժերը։
NEWS.am-ի հետ զրույցում Արագածավանի գյուղապետ Անդրանիկ Պապիկյանը, սակայն, հայտնեց, որ տեղյակ չէ, թե ինչով է պայմանավորված գյուղում ուժեղացված հսկողությունը:
«Չեմ կարող ասել` ինչի համար են հսկում, իրենց ծառայությունն է, իրենք որոշում են, իրենք էլ հսկում են, բայց գյուղը լրիվ հանդարտ է»,-ասաց գյուղապետը:
Անդրանիկ Պապիկյանը տեղեկացրեց, որ ոստիկանները նույնիսկ իր աշխատասենյակում են հերթապահում, նրանց մի մասն էլ տեղավորվել է գյուղի ակումբում:
«Ոստիկանության գեներալները էս քանի օր է` իմ կաբինետում նստած են, մի մասին տեղավորել ենք ակումբում, բա ու՞ր գնան, իմ մոտ հարմար է էլի»,-ասաց գյուղապետը:
Այն դիտարկմանը, թե գուցե ոստիկանները իր անվտանգությունն են ապահովում, գյուղապետը ասաց, «չէ, հլը էդքան չենք հասել»:
Անդրադառնալով Աշոտ Խամոյանի` գյուղում հրկիզումներ իրականացնելու մեջ կասկածվելուն, Պապիկյանը նշեց, որ տեղյակ չէ, թե ոստիկանությունը ինչ հիմքով է նրան գործով որպես կասկածյալ ներգրավել. ինքը հրկիզումների վայրում Աշոտ Խամոյանին չի նկատել:
«Ոստիկանությունից հարցրեք` որտեղից է վերցրել, որեւէ մեկը խոստովանե՞լ է, տեսե՞լ է: Ես մեքենաները հրկիզելու պահից այնտեղ եմ եղել մինչեւ վերջ, ոչ մեկի չեմ տեսել, ու ոչ ոք չի էլ կարող ասել, թե ով է հրկիզել: Բայց ինչքան գիտեմ Աշոտը գյուղում է»,-ասաց գյուղապետը:
Նշենք, որ, ըստ Ոստիկանության, Արտյոմ Խամոյանին եւ Վարդգես Գալստյանին մահացու հրազենային, Արման Խամոյանին հրազենային վնասվածք պատճառելու մեղադրանքով կալանավորվել է Արագածավան գյուղի բնակիչ, 35-ամյա Սեդրակ Ղազարյանը:
Տարածված լուրերի համաձայն, Սեդրակ Ղազարյանը եւ Խամոյանները վաղեմի թշնամություն են ունեցել: Սպանությամբ ավարտված վիճաբանությունը ծագել է խոտի դեզը հրկիզելու պատճառով:
Հիշեցնենք, որ 2016թ. փետրվարի 3-ի ուշ երեկոյան Արագածավանում սպանվել էին 40-ամյա Արտյոմ Խամոյանն ու 49-ամյա Վարդգես Պետրոսյանը, իսկ Արտյոմ Խամոյանի եղբայրը՝ Արման Խամոյանը տեղափոխվել էր հիվանդանոց: Սպանության կասկածանքով ձերբակալվել էր նույն գյուղի բնակիչ Սեդրակ Ղազարյանը: