ՀՀ կրթության եւ գիտության նախարար Արմեն Աշոտյանը չի մեկնաբանում իր հրաժարականի մասին լուրերը։ Փետրվարի 11-ին կայացած Կառավարության նիստից հետո նախարարը դուրս է եկել լրագրողների մոտ, սակայն այս անգամ հարցերին չի պատասխանել։

Նախօրեին ՀՀԿ գործադիր մարմնի նիստից հետո Էդուարդ Շարմազանովը ուղիղ պատասխան չէր տվել այն հարցին, թե Կառավարության անդամներից ով է տեղ ազատելու ՀՅԴ ներկայացուցիչների համար։ Ամենահավանական թեկնածուների թվում են կրթության եւ գիտության, արդարադատության եւ տարածքային կառավարման նախարարները։

Դրա փոխարեն Շարմազանովը խորհուրդ է տվել 3 օր սպասել՝ հավելելով, որ որոշ գործընկերներ կարող են շարունակել աշխատանքը կուսակցական գծով (Աշոտյանը նաեւ ՀՀԿ փոխնախագահն է)։