Պետությունն անօրինականություն է գործում Հայաստանի ավտոներկրողների նկատմամբ: Այս մասին այսօր՝ փետրվարի 11-ին, լրագրողների հետ հանդիպմանը հայտնեցին ավտոներկրողներ Կամո Մարությանը եւ Պողոս Օղլուկյանը:
Ըստ նրանց՝ ԵՏՄ երկրներից ավտոմեքենա ներկրելիս իրենք ստիպված են վճարել գրեթե նույնքան ավելացված արժեքի հարկ, որքան ԵՏՄ անդամ չհանդիսացող Վրաստանից ներկրելիս, մինչդեռ օրենքը նման կետ չի նախատեսում:
«Հայաստանում նույն տարում մեկից ավելի անշարժ եւ շարժական գույք վաճառելիս ավելացված արժեքի հարկ են պահանջում: Ստացվում է, որ ավտոներկրողները կրկնակի հարկ են վճարում»,- NEWS.am-ի հետ զրույցում նշեց Կամո Մարությանը:
Բանախոսները պահանջում են ավելացված արժեքի հարկը չկիրառել ԵՏՄ երկրներից ներկրված ավտոմեքենաների համար ինչպես Բելառուսում, Ղազախստանում, եւ ԵՏՄ անդամ այլ երկրներում է: Հակառակ դեպքում առանց այն էլ ծանր սոցիալական պայմաններում ապրող հայաստանցիների համար սա արտագաղթի նոր ալիք կարող է դառնալ, համոզված է Կամո Մարությանը:
Առաջիկայում ավտոներկրողները պատրաստվում են ՀՀ Ֆինանսների նախարարությանը խնդրի հետ կապված գրություն հղել, ցույց կազմակերպել Կառավարության շենքի մոտ եւ դիմել վարչապետին:
Նշենք, որ փետրվարի 8-ին ԵՏՄ ինտեգրման եւ մակրոտնտեսության հարցերով նախարար Տատյանա Վալովայան հայտատարել էր, որ Հայաստանի` ԵՏՄ-ին անդամակցելուց հետո Ռուսաստանից Հայաստան ներկրվող մեքենաների համար քաղաքացիներից չպետք է ավելացված արժեքի հարկ գանձվեր: