Մոսկվայի ոստիկանության աշխատակիցները ձերբակալել են Հայաստանի 3 քաղաքացու, որոնց կասկածում են ՌԴ մայրաքաղաքում ավազակային հարձակումների մեջ։ Այս մասին ՏԱՍՍ-ին հայտնել են Մոսկվայի իրավապահ մարմիններից։
Աղբյուրի տեղեկություններով՝ ձերբակալվածները հունվարի 20-ին ներխուժել են Շիպիլովսկայա փողոցի համար 13 տունը եւ զենքի սպառնալիքի տակ տանտիրուհուց գողացել զարդեր, գումար եւ մեքենայի բանալիներն ու փաստաթղթերը։ Այդ մեքենայով էլ նրանք դիմել են փախուստի։
«Օպերատիվ միջոցառումների ընթացքում ոստիկանները Կրասնոդարի երկրամասում ձերբակալել են հանցավոր խմբի ղեկավարին, իսկ դրանից հետո Մերձմոսկովյան տարածքում՝ հանցագործության 2 մասնակիցներին»,- ասել է գործակալության զրուցակիցը։ Բոլոր ձերբակալվածները ՀՀ քաղաքացիներ են։
Նրանց մեղադրանք է ներկայացվել ավազակային հարձակման համար։ Ըստ օպերատիվ տեղեկությունների՝ նրանք Մոսկվայում մի շարք նմանատիպ հանցագործություններ են կատարել։