Դաշնակցությանը ծանր աշխատանք, կյանք է սպասվում Շիրակի մարզում: Այս մասին NEWS.am-ի հետ զրույցում ասաց Գյումրիի նախկին քաղաքապետ Վարդան Ղուկասյանն` անդրադառնալով Շիրակի մարզպետի պորտֆելը ՀՅԴ-ին տալու հեռանկարին:
«Ինչու չէ, եթե ցանկություն լինի կարող են փոխել: 30 տարի սոցիալապես ամենածանր մարզն է: Կապրենք` կտեսնենք, եթե փոխվեց կասենք` փոխեցին, չէ` չէ: Բայց սա ծանր վիճակում մարզ է, իհարկե, ծանր կյանք, աշխատանք է սպասվում իրենց»,-ասաց Վարդան Ղուկասյանը:
Հարցին` ի՞նչ կհաջողվի անել ՀՅԴ-ին, որ այդպես էլ չի հաջողվում ՀՀԿ-ին, նախկին քաղաքապետը պատասխանեց. «Ես հիմա ինչ կարող եմ ասել: Ես գիտեմ, որ Դաշնակցությունը ամբողջ աշխարհով տարածված է , եթե փոփոխություններ անեն, թող անեն: Ես գիտեմ, որ եթե ցանկություն լինի փոփոխություններ անել, կարվի: Տնտեսական գոտի պիտի ստեղծեն ու ինքն իրան կշարժվի տեղից: Դաշնակցությունը 125 տարվա կուսակցություն է` հայ ժողովրդի ծոցից դուրս եկած, ինչ է պատահել որ, բոլոր տեղերում լավն էլ կա, վատն էլ կա, բոլոր կուսակցություններում: Գյումրին էսօր էնպիսի պայմաններում է, որ ծանր վիճակում է գտնվում: Հանրապետության սոցիալական առումով ամենածանր վիճակը Շիրակի մարզն է»,-նշեց նա:
Վարդան Ղուկասյանը խուսափեց նշել դաշնակցական մարզպետի դեպքում կառաջադրի իր թեկնածությունը Գյումրիի քաղաքապետի ընտրություններում, թե ոչ:
«Ես քաղաքականությամբ չեմ զբաղվում, չեմ վերցնում, չեմ դնում, չգիտեմ, հիմա ոչինչ չեմ կարող ասել»,-ասաց նա: