«Բարգավաճ Հայաստան» կուսակցությունը լրջորեն պատրաստվում է 2017թ. խորհրդարանական ընտրություններին, որտեղ կներկայանա որպես առանձին քաղաքական ուժ: Այս մասին այսօր` փետրվարի 12-ին լրագրողների հետ հանդիպման ժամանակ նշել են ԲՀԿ խմբակցության պատգամավորներ Վահան Բաբայանը եւ Միքայել Մելքումյանը` հավելելով, որ իրենք հանդես են գալու մի շարք ծրագրերով:
«Բարգավաճ Հայաստանում» ֆորսմաժորային, կամ ինտրիգային վիճակներ չկան: Մենք լրջորեն պատրաստվում ենք խորհրդարանական 2017թ. ընտրություններին, որը բոլոր քաղաքական ուժերին համար թեստ է լինելու: Մենք մի շարք օրենսդրական փոփոխություններ ենք առաջարկելու, որոնք կօգնեն մեր ընտրողներին: «Ռեժի'մ, հեռացի'ր» ասելով, հրապարակում գոռալով խնդիրները չեն լուծվելու, անհրաժեշտ է ծրագրային առաջարկներով հանդես գալ»,-նշեց Վահան Բաբայանը:
Միքայել Մելքումյանն էլ շեշտեց, որ ԲՀԿ-ն կարեւորում է երկրի տնտեսական զարգացումը, որի ուղղությամբ իրենք բազմաթիվ առաջարկներով են հանդես գալու, եւ հետեւողական են լինելու դրանց իրականացմանը:
«Մենք մանրակրկիտ հետեւելու ենք գյուղնախարարությանը, որպեսզի գյուղացիները, խաղողի մթերման, եւ այլ գյուղմթերքի իրացման խնդիր չունենան: Կառավարության ուշադրությունն ենք հրավիրելու բարձր տոկոսադրույք ունեցող վարկերին, առաջարկելու ենք, որպեսզի գազի գինը Հայաստանում իջնի, Իրան-Հայաստան համագործակցության զարգացման արդյունքում է դա հնարավոր: Մենք ուղղակի չենք ասի` «ռեժի'մ, հեռացի'ր» այլ կոնկրետ ծրագրերի շուրջ ասելու ենք` Կառավարություն ի՞նչ ես անելու»,-ասաց Միքայել Մելքումյանը:
ԲՀԿ-ականները վստահեցրին, որ եթե իրենք հրապարակներից «ռեժիմ հեռացիր» չեն գոչում, չեն «հայհոյում իշխանություններին», դեռ չի նշանակում, որ իրենք ընդդիմություն չեն, պարզապես, իրենք կարծում են, որ անհրաժեշտ է աշխատել եւ իշխանության եւ ընդդիմության հետ:
