ՀԱՊԿ-ը ներգրավված չէ ղարաբաղյան հակամարտության կարգավորման գործընթացում։ Այս մասին փետրվարի 12-ին՝ հեռուստակամուրջի ժամանակ, հայտնել է կազմակերպության գլխավոր քարտուղար Նիկոլայ Բորդյուժան։
Անդրադառնալով ՀԱԿՊ վերջին գագաթնաժողովում Հայաստանի նախագահի ելույթին եւ հայ-ադրբեջանական սահմանին իրավիճակի կապակցությամբ ՀԱՊԿ դիրքորոշման հանդեպ Հայաստանի իշխանությունների դժգոհությանը՝ Նիկոլայ Բորդյուժան պատասխանեց. «Ես այդ նուրբ հարցում ՀԱՊԿ դիրքորոշումը փոխելու անհրաժեշտություն չեմ տեսնում։ Իրավիճակը վերաբերում է մեր ամենակարեւոր դաշնակիցներից մեկին՝ Հայաստանին։ Հակամարտության կարգավորմամբ զբաղվում են ԵԱՀԿ ստեղծած այլ միջազգային ինստիտուտները։ Այդ պատճառով ինչ-որ կերպ այդ նուրբ հարցում ՀԱՊԿ դիրքորոշումը փոխելն իմաստ չունի»։
Բորդյուժան նշել է, որ ամեն տարի կառույցի անդամ երկրների ընդհանուր հայտարարություններում երկրների արտահայտած դիրքորոշմամբ միշտ ողջունվում է հակամարտության մեջ առաջընթացի գրանցումը։ «ՀԱՊԿ դիրքորոշումը պարզ է եւ հստակ. բոլոր անդամ երկրները կողմ են հակամարտությունը խաղաղ ճանապարհով լուծելուն։ Բոլոր երկրները դեմ են հայ-ադրբեջանական սահմանին լարվածության աճին, ծանր զինատեսակի եւ տեխնիկայի կիրառմանը։ Մնացածի համար Մարքս կարդացեք, այնտեղ ամեն բան գրված է»,- ասել է Նիկոլայ Բորդյուժան։
