Ճապոնիան եւ Մեծ Բրիտանիան այս տարվա հոկտեմբերին կարող են առաջին համատեղ ռազմաօդային զորավարժություններն անցկացնել, որոնց կմասնակցեն Ճապոնիայի ազգային ինքնապաշտպանության ուժերը եւ Մեծ Բրիտանիայի Թագավորական ռազմաօդային ուժերը (RAF): Այդ ուղղությամբ երկխոսությունն ակտիվացնելու պայմանավորվածությունը ձեռք է բերվել Տոկիայում Ճապոնիայի պաշտպանության նախարար Գեն Նակատանիի եւ RAF-ի հրամանատարի տեղակալ Գրեգ Բագուելլի միջեւ կայացած բանակցությունների արդյունքում, տեղեկացնում է ՏԱՍՍ-ը:
«Նման զորավարժությունների անցկացումը ծայրաստիճան կարեւոր է տարածաշրջանային անվտանգության բարձրացման համար», - ընդգծել է Նակատանին: Բագուելլը նաեւ նշել է նման զորավարժությունների կարեւորությունը եւ հավելել, որ դրանց անցկացումը նպաստում է «երկու պետության միջեւ կապերի ամրապնդմանը»:
Ավելի վաղ` տարեսկզբին Տոկիոն եւ Լոնդոնն արդեն պատրաստակամություն էին հայտնել` անցկացնելու առաջին համատեղ ռազմաօդային զորավարժությունները: Հունվարին Տոկիոյում Նակատանիի եւ իր բրիտանացի գործընկեր Մայքլ Ֆելլոնի միջեւ տեղի ունեցած բանակցությունների ընթացքում կողմերը նշել էին, որ զորավարժությունները տեղի կունենան Ճապոնիայի տարածքում, ինչի համար Մեծ Բրիտանիան կուղարկի իր ՌՕՈՒ-ի կործանիչներին:
Բանակցությունների ընթացքում կողմերը նաեւ պայմանավորվել են շարունակել ակտիվ համագործակցությունը ԿԺԴՀ-ի խնդիրների շուրջ, որը վերջերս հերթական հրթիռն էր արձակել: