Toyota ընկերությունը ներկայացրել է Tacoma – TRD Pro պիկապի նոր մոդիֆիկացիան: Այսպիսով` ընկերության ամենագնացային շարքն ընդլայնվել է` հասնելով երեք մոդելի: Նախկինում դրա մեջ էին մտնում Tundra-ն եւ 4Runner-ը: Նորույթը ներկայացրել են Չիկագոյի ավտոսալոնում:
Մոդելը կոմպլեկտավորված է 3,5 լիտրանոց բենզինային V6 շարժիչով, որի հզորությունը 281 ձիաուժ է, իսկ պտույտի պահը` 360 Նմ: Շարժիչն աշխատում է կամ վեցաստիճանանի «մեխանիկայով» կամ էլ ավտոմատ տուփով, որն աստիճանների նույն թիվն ունի, տեղեկացնում է Motor-ը:
TRD Pro-ի շարքից «Տակոմայի» էքստերիերի լրամշակումները ներառում են 16 դյույմանոց անվային սկավառակներ Goodyear Wrangler All-Terrain Kevlar անվադողերով, թափքի դիմային մասի ալյումինային պաշտպանիչ տարրեր, հակամառախուղային լուսադիոդներ, դիմացի եւ հետեւամասի օպտիկայի սեւ շրջանակներ, TRD Pro-ի պիտակացուցանակներ:
Toyota Tacoma-ի տեխնիկական լրամշակումները կազմված են FOX նոր ամորտիզատորներից եւ TRD զսպանակներից:
Ինտերիերում հայտնվել են սեւ կաշվով երեսպատված բազկաթոռներ եւ բազմաֆունկցիոնալ ղեկ, Entune աուդիոհամակարգ, ինչպես նաեւ փոխանցումների տուփի սելեկտոր եւ TRD-ի գորգիկներ:
Մոդելի վաճառքը, որի արտադրությունը կիրականացվի ԱՄՆ-ում, կսկսվի 2016-ի աշնանը: