Վրաստանը կարեւորում է Հայաստանի հետ բազմակողմանի համագործակցության զարգացումը եւ այդ ուղղությամբ ջանքերի շարունակումը։ Այդ մասին ասել է Վրաստանի արտաքին գործերի նախարար Միխեիլ Ջանելիձեն՝ փետրվարի 12-ին Մյունխենի անվտանգության հարցերով համաժողովի աշխատանքներին մասնակցող Հայաստանի արտգործնախարար Էդվարդ Նալբանդյանի հետ հանդիպմանը։

Շնորհավորելով գործընկերոջը բարեկամ Վրաստանի արտգործնախարարի պաշտոնը ստանձնելու կապակցությամբ՝ Էդվարդ Նալբանդյանը վստահություն հայտնեց, որ համատեղ ջանքերի շնորհիվ հայ-վրացական բարիդրացիական հարաբերություններն առավել կընդլայնվեն ու կխորանան։

Շնորհակալություն հայտնելով շնորհավորանքի եւ բարեմաղթանքների համար՝ Միխեիլ Ջանելիձեն նշեց, որ իր երկիրը կարեւորում է Հայաստանի հետ բազմակողմանի համագործակցության զարգացումը եւ այդ ուղղությամբ ջանքերի շարունակումը։

Զրուցակիցները մտքեր փոխանակեցին տարբեր ոլորտներում համագործակցության շուրջ, կարեւորեցին բարձրաստիճան փոխայցելությունները, արտգործնախարարությունների միջեւ խորհրդատվությունների անցկացումը, միջազգային կառույցներում փոխգործակցության սերտացումը։

Հայաստանի արտգործնախարարը Վրաստանի ԱԳՆ ղեկավարին հրավիրեց այցելել Երեւան։