Երեւանի «Մալաթիա» տոնավաճառի մոտ նախորդ տարվա սեպտեմբերին նախկին կնոջը դանակի 30 հարվածով սպանած 40-ամյա Արտակ Առաքելյանի հայրը՝ Սոկրատ Առաքելյանը, վստահ է՝ որդին այդ քայլին դիմել է խանդից դրդված, իսկ խանդելու պատճառներ ունեցել է։
«Կասկածել ա, որ Թուրքիա ա գնում-գալիս, երեխեքն են կոմպյուտերով տեսել ասել են, որ ինչ-որ թուրք կա, խանդել ա, որ խանդել ա, ուրեմն սիրել ա»,-ասում է Սոկրատ Առաքելյանը։
Նախկին կնոջը սպանելու մեջ մեղադրվողի հայրը նշում է, որ Արտակի եւ Հեղինեի հարաբերությունները վատացել են ապրանք բերելու նպատակով Թուրքիա մեկնելուց եւ վերադառնալուց հետո։
«Էդ մոմենտն ա եղել, որ իրենց հարաբերությունները վատացել են, գնալ-գալու կասկածներ ա, բան ա։ Հետո երկուսով են գնացել, եկել, իմ տղեն մի տարի ա տառապում ա էդ ցավից, ինքը մինչեւ վերջ ձգտել ա հարթել ամեն ինչ»,-ասում է Սոկրատ Առաքելյանը։
Մինչդեռ սպանված Հեղինե Դարբազյանի քույրը՝ Քրիստինեն, ասում է, որ Թուրքիա ամուսինները միասին են մեկնել առեւտրի, Արտակը մի թուրքի 800 ԱՄՆ դոլար է պարտք մնացել, որը ստանալու նպատակով սկայպով երբեմն կապվել է Հեղինեի հետ, քանի որ Արտակը խուսափել է նրա հետ խոսելուց։
«Պարտքեր ուներ, կնոջն էր դեմ տալիս, ասում էր, արի, խոսա, մի բան ասա։ Ինքը մինչեւ հիմա էդ թուրքին պարտք ա»,-ասում է Քրիստինե Դարբազյանը։
Սպանվածի քրոջ խոսքով՝ Արտակը կնոջ սպանել է ոչ թե խանդից եւ նրա անհավարտության վերաբերյալ կասկածներից, այլ այն պատճառով, որ կինը լքել է նրան եւ այլեւս ֆինանսապես չի աջակցել։
«Իրար հետ նոյեմբեր ամսին գնացել են Թուրքիա, եթե էնտեղ իրան սխալ ա պահել, ինչի՞ ա գալիս հինգը ամիս հետը ապրում, հետո կինը բաժանվում, գնում ա, հինգ ամիս էլ առանձին ա ապրում, նոր հիշու՞մ ա, որ պիտի սպանի, կամ խանդ կա՞ր, կամ թուրք կա՞ր, դա անհավանական ա։ Մարդը եթե իմանում ա, որ իր կինը դավաճանել ա, նույն վայրկյանին անում ա էդ ամեն ինչը, ոչ թե 11 ամիս հետո»,-ասում է սպանված Հեղինեի քույր։
Քրիստինեն վստահեցնում է, որ իր քույրը ոչ մի կասկածելի կապերի մեջ չի եղել։ Արտակը, պարզապես, պարբերաբար ահաբեկել է նրան, պահանջել մարել իր պարտքերը, իսկ երբ որդուց իմացել է, որ Հեղինեն պատրաստվում է մեկնել երկրից, իրականացրել է, ըստ Քրիստինեի, վաղուց պլանավորած սպանությունը։
Հիշեցնենք, որ 2015թ. սեպտեմբերի 27-ին` ժամը 15.00-ին սահմանում «Մալաթիա» տոնավաճառի մոտ դանակահարություն էր http://news.am/arm/news/288074.html տեղի ունեցել: 38-ամյա Հեղինե Դարբազյանը մահացել էր ստացած` դանակի 30-ից ավելի հարվածներից: Սպանությունը գործելու մեղադրանով կալանավորվել է կնոջ նախկին ամուսինը` 40-ամյա Արտակ Առաքելյանը, որը խոստովանել է, որ կնոջը սպանել է խանդի հողի վրա:
Արտակ Առաքելյանին մեղադրանք է առաջադրվել ՔՕ 104-րդ հոդվածի 1-ին մասով (սպանություն), 235-րդ հոդվածի 4-րդ մասով (ապօրինի կերպով զենք կրել): Նրան մինչեւ 20 տարի ազատազրկում է սպառնում:
