ԱԺ պետա-իրավական հանձնաժողովում ընդդիմության եւ իշխանության թեկնածուների օգտին քվեարկությունը ՀՅԴ պատգամավոր Արծվիկ Մինասյանը NEWS.am-ի հետ զրույցում պայմանավորեց այն հանգամանքով, որ ցանկանում էր բոլոր թեկնածուներն էլ անցնեն ու ներկայանան լիագումար նիստում:
Մեր հարցին, թե իշխանության հետ ՀՅԴ-ի կոալիցիա կազմելու գործընթացի՞ց էր բխում իր «կողմը» ՀՀԿ-ի թեկնածու Արման Թաթոյանի օգտին, Մինասյանը պարզաբանեց. «Եթե ես մտածեի այդ ձեւով, ես պետք է դեմ քվեարկեի մյուս երկու թեկնածուին եւ միայն իշխանության թեկնածուի օգտին քվեարկեի, բայց ես կողմ եմ քվեարկել երեքին էլ, քանի որ համարում եմ, որ լիագումար նիստն է վճռահատում այս հարցը եւ հետեւաբար ինչքան շատ թեկնածուներ լինեն, այնքան լավ»,-ասաց Մինասյանը:
Նշենք, որ Մինասյանը այսպես փորձեց հիմնավորել այն դեպքում, երբ իր ներկայությամբ ՀԱԿ ներկայացուցիչ Գագիկ Ջհանգիրյանը հրաժարվեց քվերակությանը մասնակցել` նշելով, որ դա խմբակցության որոշումն է: Ջհանգիրյանի հեռանալուց հետո լրագրողների համար էլ անգամ պարզ էր, որ մեկ ձայնի տարբերությամբ Արման Թաթոյանն է ընտրվելու եւ լիագումար նիստում միակ թեկնածուն է լինելու: Իշխանության թեկնածուի օգտին քվեարկեց յոթ պատգամավոր, իսկ Զարուհի Փոստանջյանի` հինգ: Այսինքն, Եթե Արծվիկ Մինասյանը չքվեարկեր Արման Թաթոյանի օգտին, ձայները կհավասարվեին եւ Արծվիկ Մինասյանի ուզած տարբերակը ինքնին տեղի կունենար, լիագումար նիստում կլիներ առնվազն երկու թեկնածու:
«Ես համակարծիք եմ, որ շատ թեկնածուներ լինեն լիագումար նիստում, եթե բավարարում են պահանջներին, ես դրանից ելնելով` քվեարկում եմ կողմ, ինձ ասում էին` Զառային պիտի կողմ քվեարկեիր, մյուսներին` դեմ, ինչո՞ւ, տրամաբանությունը ո՞րն է»,-տարակուսեց Մինասյանը:
Թերեւս իր տրամաբանությունը արդաարցնելու նպատակով ՀՅԴ ներկայացուցիչը քվեարկել էր նաեւ Տիգրան Ուրիխանյանի ներկայացրած թեկնածուի օգտին, որին դահլիճում գտնվողներից, բացի Տիգրան Ուրիխանյանից, ոչ ոք չէր ճանաչում:
