Լոս Անջելեսի ոստիկանությունը պայմանական ազատազրկման դատապարտված երկու հայի է ձերբակալել: Սան Վելլի մոթելում նրանց մոտ 2 ատրճանակ, մարիխուանա եւ հերոսին, ինչպես նաեւ 15 կեղծ բանկային քարտ են հայտնաբերել: Այս մասին գրում է Los Angeles Times-ը:
Նրանցից մեկը՝ 33-ամյա Հովիկ Արզույանը, հետախուզման մեջ էր այն բանից հետո, երբ նշված ժամին չէր ներկայացել սպաներին:
Հայկական հայտնի Armenian Power բանդայի անդամ Արզույանը երկու տարի առաջ ձերբակալվել էր Գլենդելում կատարած գողության համար:
Նույն մոթելում ոստիկանությունը հայտնաբերել է նաեւ նրա համախոհին՝ 30-ամյա Գաբրիել Քեչեչյանին, որը նույնպես մեղադրված էր գողության համար: Նրա մոտ Toyota Corolla ավտոմեքենայի բանալի են գտել, որը հանցակիցները մի քանի օր առաջ գողացել էին Հյուսիսային Հոլիվուդում:
Մոթելում է եղել նաեւ Արզույանի տարեց հայրը, որին, սակայն, չեն ձերբակալել:
