Ռուս-վրացական սահմանի Վերին Լարս անցակետում խնդիրներ են ծագել բեռնատար մեքենաների տեխնիկական խնդիրների պատճառով: Այդ մասին NEWS.am-ին հայտնեցին Հայաստանի տրանսպորտի եւ կապի նախարարությունից՝ մեկնաբանելով տեղեկությունները, թե անցակետը արդեն մի քանի օր չի գործում:
Նախարարության հասարակայնության հետ կապերի բաժնից փոխանցեցին, որ անցակետում բեռնատարների կուտակումը կապված է մեքենաների տեխնիկական խնդիրների հետ:
Ներկայումս նախարարությունը փորձում է պաշտոնական խողովակներով ճշտել բեռնատարների կուտակման պատճառը եւ համապատասխան միջոցներ ձեռնարկել:
Նշենք, որ Հայաստանի համար «Վերին Լարսը» հիմնական ավտոտարանցային կետն է, որով իրականացվում են բեռնափոխադրումներն ու ուղեւորափոխադրումները Հայաստանի եւ Ռուսաստանի միջեւ:
Ինչպես արդեն հաղորդել է NEWS.am-ը, «Վերին Լարս» անցակետը երկարատեւ ընդմիջումից հետո վերսկսել է իր աշխատանքը 2010թ. մարտի 1-ին: Բանակցությունները տարվել են Շվեյցարիայի դեսպանատան միջնորդությամբ: Անցակետը փակվել էր 2008թ. օգոստոսյան պատերազմից առաջ:
