Հայաստանի քաղաքացիները շուտով հնարավորություն կստանան ինտերնետի միջոցով արտասահմանում գնված ապրանքներն ստանալ առանց մաքսային ձեւակերպումների։
Նման հնարավորություն սպառողներին ընձեռելու է «Հայփոստը»։ Խուան Պաբլո Գեչիդչյանը, ով նաեւ «Հայփոստ Տրաստ Մենեջմենթի» գլխավոր տնօրենն է, այսօր` սեպտեմբերի 17-ին լրագրողներին տեղեկացրեց, որ Պետեկամուտների կոմիտեի հետ համաձայնության արդյունքում, արտասահմանում գնված մինչեւ 50 հազ. դրամ (մոտ 135 դոլար) արժողությամբ ապրանքները (եթե դրանք առաքվում են «Հայփոստի» միջոցով) մաքսային ճանապարհը կհատեն «կանաչ ուղի» սկզբունքով եւ փոստային բաժանմունքների կողմից կհասցվեն մինչեւ քաղաքացու բնակարան։ Ըստ Գեչիդչյանի՝ կառավարության հետ բանակցությունների արդյունքում, կազմվել է օրենսդրական նախագիծ, որտեղ քաղաքացին հնարավորություն կստանա այդ սկզբունքով տարեկան 2 անգամ ներկրել մինչեւ 150 հազ. դրամ (մոտ 400 դոլար) արժողությամբ ապրանքներ։