Հայոց ցեղասպանության թանգարան-ինստիտուտը հայտնում է, որ սեպտեմբերի 19-ին, ժամը 12-ին Ցեղասպանության զոհերի հուշահամալիրի մոտ կմատուցվի պատարագ եւ կկայանա բողոքի հանրահավաք՝ ընդդեմ Վանի Աղթամար կղզու Սուրբ Խաչ տաճարի շուրջ թուրքական կառավարության կողմից ձեռնարկվող քարոզչական գործողությունների:
Հիշեցնենք, որ այդ օրը Աղթամարի Սուրբ Խաչ եկեղեցում առաջին անգամ պատարագ է մատուցվելու, սակայն թուրքական իշխանությունները հայտարարել են, որ չեն հասցնի մինչ այդ օրը եկեղեցու գմբեթին խաչ տեղադրել: Խաչն արդեն տեղափոխվել է կղզի եւ կդրվի եկեղեցու մոտ:
Հայ առաքելական եկեղեցին, Մեծի Տանն Կիլիկիո կաթողիկոսությունն ու Երուսաղեմի պատրիարքությունը հրաժարվել են մասնակցել պատարագին: Պատարագը կգլխավորի Պոլսո փոխպատրիարք Արամ Աթեշյանը:
Հայ հասարակության մեջ կարծիքները կիսվել են: Մի մասը համարում է, որ պետք է բոյկոտել այդ միջոցառումը, քանի որ դրանով Թուրքիան իր իմիջի խնդիրն է լուծում, իսկ մյուս հատվածը գտնում է, որ պետք է մասնակցել պատարագին, քանի որ դա դա դուռ կբացի հետագայում եւս Թուրքիայի տարածքում հայկական մյուս եկեղեցիների վերանորոգման համար:
